SHILLONG:
Ka MP Lok Sabha na ka seng Trinamool Congress (TMC), ka Mahua Moitra, ha ka 23 tarik Rymphang ka la kren sha ki lad pathai khubor da kaba pynpaw ba kala lum ïaka jingïalang watla sah satang ar sngi shwa ban poi noh ka sngi jied nohmihkhmat hapoh ka jylla Meghalaya.
Na ka liang ka Moitra ka la ong ba ka seng ka la sakhi ïa ka jingïalang paidbah ha Rajabala kaba iphuh iphieng bad ka jingtuid jong ki paidbah ka pynpaw ïa ka jingieid bad jingkyrshan ïaka nongïalam ba rangbah ka seng, ka Mamata Banerjee .
Ka Moitra ka la pynpaw ba ka jingtuid ki paidbah sha ka jingïalang jong ka TMC ka pyni ba ki paidbah ki angnud ïa ka jingkylla bad ka don ka daw ba ki paidbah kin mih ban kyrshan ïa kano kano ka bynta bad watla ka jylla Meghalaya ka long kaba rit, ka jingtuid haduh 60-70 hajar ngut ki paidbah kam dei kaba suk.
Ka la pynpaw shuh shuh ba ha ka por elekshon ka ju don beit ka jingshah kren tangba ka kham banjur ïa ki ar tylli ki seng national kiba la kren ïa ka TMC, kata kawei ka long na u Myntri ka sorkar pdeng, u Amit Shah u ba la kam ba ka jylla Meghalaya kadei kawei ka jylla kaba bamsap tam na baroh. Halor kane ka la ong “U Amit Shah kum u Myntri ka sorkar pdeng u dei ruh u nongïalam rangbah ka seng BJP bad ka BJP lada ngam bakla ka donlang ha ka sorkar synrop bad ka NPP tang hapoh 40 sngi. Ka jingkylli ka long, lada phi don bynta lang mynta la 5 snem bad ka sorkar jong ka jylla kamut phi ïohi shai kdar ba ka jylla Meghalaya ka jur ha ka jingbamsap, kumta ka dei kata ka daw ba ki paidbah ki angnud ïa ka jingkylla bad dei na kata ka daw ba ka Trinamool Congress ka don hangne mynta”.
Ha kawei pat ka bynta ka long halor ka jingkren ba la pynpaw ha ka jingïalang ha ka nongbah Shillong ba la kren da u president barim ka seng Congress ba dei ruh u MP, u Rahul Gandhi u ba la ong ba ka TMC ka don hangne mynta ban ïarap ïa ka BJP bad ba ka dei ka Team B jong ka BJP. Halor kane ka bynta ka Moitra kala ong, “Ki sngi ban synshar tang ki national party ha ka ri India ka la kut mynta, lada ngi hap ban ap khmih tang ha ka “Bi-Party” system kamut ka synshar khadar kan nym don shuh hapoh ka ri India. Ka seng Trinamool Congress kala ksar mynta la 34 snem bad kala wan haka bor ha West-Bengal mynta la 3 sien kynthih, ngim donkam ban pynshisha ïano ïano ba ngi pyrshah BJP, nga tharai mangi baroh ba shong hangne ngi la dep pynsngewthuh sha ki paidbah ka ri India ba ngi don ka chairperson ba lada don kano kano ka jingpynibor kaba ïeng pyrshah kino kino ki jingeh baroh, ka dei beit ka Trinamool pyrshah ïa ka BJP. Ngim donkam ban pynshisha ïa kane bad ngim donkam syrnod nangno nangno ruh”.
“Kaba ngi sngew dei eh ban pyrkhat ka long ngi mih madan ban ïakhun ïa ka BJP bad ïa baroh kiwei ki ba pynïasoh bad ka BJP, ngi dei ka seng national bad ngi don ka hok ban ïakhun na baroh ki jylla. Ngi la pyni ka jubab ha West Bengal ha kaba ka jingïakhun pyrshah jong ngi ïa ka BJP ka paw”, ka la bynrap.
Shuh shuh haba kren pat halor ka jylla Meghalaya, ka la ong ba ka jingbamsap bad ka jinghiar ha ka roi ka par ka paw shai kdar. Kala ong baka jylla Meghalaya kam dei ka jylla kaba duk, ka jylla Meghalaya ka riewspah ha ki marpoh khyndew. Ka la ong, hynrei ka sorkar barim ba la synshar ïa ka jylla Meghalaya kam shym la phai khmat sha ki kam pynroi la ha ka jingpynbha ïa ki jingtei, ki surok, ki jaka ai jingsumar bad kiwei kiwei. “Ngi wan hangne mynta ban tyrwa ïa ki paidbah da kawei pat ka lad ban bujli kum ka seng national bad ngim donkam ban pynshai ïano ïano ruh bad ngi sngewkmen ba ki paidbah ki kyrshan bad ki ai ka jingieid bad ngi kyrmen ba ha ka 27 tarik u Rymphang, ki paidbah kin jied da ka jingsngewthuh”.
