NONGSTOIÑ:
U kyrtong shimet na Nongstoiñ, u Bah Bobby B Kharchandi lem bad ka kynhun ki jong u, ha ka 27 tarik Kyllalyngkot kila leit ban pynïasoh noh sha ka seng Voice of the People Party (VPP) ha ka jingïalang kaba la long hapoh Bishop Hall Nongstoiñ.
Ha kane ka jingïalang la ïadon ryngkat lang ruh da u President Rangbah ka seng VPP, u Bah Ardent Miller Basaïawmoit uba la ïoh ruh ban pynskhem ïa ki dkhot bad ki nongkitkam bapura jong ka seng VPP Nongstoiñ Konstitwensi ha kaba la jied ruh ïa u Bah Bobby kum u President, u Bah Samuwell Marngar Vice President, u Bah P.K Lyngdoh General Secretary lem bad ki 23 ngut ki dkhot bad nongkitkam.
Na ka liang jong u Vice President ka seng VPP u Dr. H Kara Chen u la pynbna ruh ba u Bah Boby B Kharchandi un long u kyrtong jong ka VPP u ban sa ïa ai reng ïa ka elekshon napoh Nongstoiñ Konstitwensi.
Haba ai jingkren ha kane ka jingïalang u Bah Bobby Kharchandi u la ong ba ka jingïaid lynti ka jong u kala long kaba eh haduh katta katta bad ha ka kutlad u briew u stad namar ba U Blei um ai ïa kaei kaba ki kwah hynrei u ai ïa kaei kaba ki briew ki donkam bad u la ai ïa ngi ïa ka VPP.
“Nga la poi rung sha ka VPP namar ki mat jong kane ka seng ki long kiba biang khamtam kata ka synshar ka khadar kaba khuid ba suba bad u la ong ruh ba wat kheiñ beiñ ïa ka VPP namar ka VPP ryngkat u paidbah kin sa pynkhynñiuh ïa ka ri bad ka jaitbynriew sa shisien”, ong u Bah Bobby.
Katba na ka liang jong u Bah Ardent haba ai jingkren ha kane ka jingïalang u la ong ba ka seng VPP kam kwah ban shim kabu ïa ki kynrum kynram ha kiwei pat ki seng saiñpyrthei bad ka VPP kam pat da don jingmut ban sei kyrtong na Nongstoiñ hynrei ha ka jingïakynduh ïa u Bah Boby u sngewthuh bad u pdiang ïa ka rukom pyrkhat bad ki nongrim jong ka VPP.
“Ngim kwah ba ki briew kin rung sha ka VPP tang ban ïoh tiket lada kim sngewthuh ïa ka nongrim hynrei kaba sngewtynnad ka long ba u Bah Bobby u don ïa ka rukom pyrkhat kumba ngi ruh ngi don ha ka VPP bad ha ngi kaba lieh ba lieh ba ïong ba ïong yn nym lah ban long da kumwei pat”, ong u Bah Ardent.
Shuh shuh u la ong ruh ba ka thong jong ka VPP ka long ban pynim bad ban pynkylla dur ïa ka Jylla ha kine ki 30 bad 50 snem ki ban sa wan lada u paidbah u ibit ban ailad ïa ka VPP bad ban ai ïa ka VPP ka bor ban synshar ïa ka ri bad ka jaitbynriew ban wanrah ïa kata ka synshar ka khadar kaba khuid ba suba namar khlem ka synshar ka khadar kaba khuid ngin ym lah ban kular eiei ïa ki paidbah.
Ym tang kata u la ong ruh ba ki paidbah kila shah shukor ha ki nongïalam saiñpyrthei ha kine ki snem kiba la leit noh bad sngewlehraiñ ban tip ba ka Meghalaya kadon sha ka bynta kaba sha trai tam na ki Jylla ka Ri India, ka jylla kaba duk tam na ki jylla sha ka thaiñ shatei lammihngi, la ka long ha ka pule ka dang le, ka koit ka khiah ka long kaba sniew tam bad shadien tam.
“Ki briew ki lah ban kynthoh ba u Bah Ardent u lapmiet sa tang ka phet seng hynrei nga dang lah ban kynriah na ka party ban ïa kaba kynriah na ka nongrim bad ngam pat ju kynriah na ka nongrim haduh mynta dei namar kata ki paidbah ki phai khmat sha ka VPP”, ong u Bah Ardent.
U la pynpaw ruh ïa ka jingsngewlyngngoh ban ïohi ba ki seng riewlum baroh kiba ïadon lang ha ka sorkar MDA ki ïather bad ki ïakynnoh ïa ka sorkar ki kynnoh tang ïa kawei ka seng saiñpyrthei tang namar bala jan ka elekshon hynrei ïano ki kynnoh bad mano kita ba don lang ha ka sorkar?
