SHILLONG:
Ka jingwanrah ïa ka mat ka jingbymdon shuh ïa ka jingshaniah ha ka Executive Committee ba la ïalam da u MDC ka United Democratic Party (UDP) u Bah Titosstarwell Chyne ha ka 19 tarik Jylliew ha ka dorbar lyïur jong ka KHADC ka la buh ïa ki nongïalam ka UDP ha ka umdum kaba khraw.
Haba kren bad u President ka United Democratic Party (UDP) u Bah Metbah Lyngdoh, u la ong ba kane ka jingbym treh shuh jong ka National People Party (NPP) bad ka United Democratic Party (UDP) hapoh ka KHADC kan ym don jingktah eiei ha ka sorkar jylla.
“Kam don kano kano ka jingpyrkhat da kumwei bad na ka liang u Myntri Rangbah ka jylla ruh um shem la ong eiei ba ngin ym ïa don shuh ka jingïatreilang hapoh ka sorkar”, u la ong.
“Ha ka ba ïadei bad ka KHADC, ka jingpynbeit bad ka party ka la don naduh ba sdang thaw ïa ka EC da ka jingïasngewthuh jingmut naduh ki MDC bad ki party naduh u snem 2019, hynrei halor ka jingwanrah ïa ka mat ba ym don shuh ka jingshaniah ngim don jingtip eiei halor kane”.
U la ong shuh shuh, “Ngin sa pynsngew halor kane ka jingjia ha u Myntri Rangbah ka jylla, hynrei namar ba ka dei ka kam jong ka District Council ngin ieh ha ka jingstad jong ki MDC namar ki dei maki ban shim ïa kano kano ka rai namar ba ki dei maki ki nongmihkhmat ka District Council”.
U la bynrap shuh shuh, “Ka jingïatreikam barabor ka lah ban don ka jingïaduna hangne hangtei hynrei ban shu pynkhyllem bad thaw EC man ka sngi kam dei, hynrei ka donkam ïa ka jingïatai ka jingïakren da ka jingsngewthuh jingmut ka ba shai”.
U Bah Metbah u la ong ruh, “La 4 snem ka EC ba ïalam ka UDP ka ïaid beit kam don kano kano ka jingbakla bad kano kano ka jingeh bad ngim lah ban sngewthuh shuh ïa ka jingthmu jong ki ba ki wanrah ïa ka jingbym shaniah shuh mynta ka sngi bad ngi donkam ban ïakren halor kane”.
