SHILLONG:
U President ka VPP u Bah Ardent Miller Basaïawmoit u la ong ba wat la ka Voice of People Party (VPP) ka don tang 4 ngut ki MLA hynrei kan ïakhun pyrshah triang ïa ka jingbamsap da ka ba ïalade ruh kin ym bam bad ïa kiwei ruh kin ym shah ban bam ha kine ki 5 snem, ïa kane u la kren ha ka jingïalang pynrung dkhot VPP ka ba la long ha ïingdorbar Mawkyrwat.
Ha ba kren ha kane ka jingïalang u Bah Ardent u la ong, “Uwei u nongïalam ka sengriewlum u ong ba phi ai ïa ngi tang 11 ngut ki MLA te ngin ïakren kumno halor ka Reservation Policy?, 11 ngut ruh dang khñium ban da dei ba ïoh ka VPP tang 10 ngut ki MLA ruh la bthei kane ka Ri Khasi. 11 ngut phi khñium, ngi la ïoh tang 4 ruh ngim khñium bad kulmar ka Sorkar MDA II, ngi ju ong ïalade ruh ngin ym bam bad ban bam kiwei ruh ngin ym shah ha kine ki 5 snem mynta”.
“Kata ka dei ka thong jong ngi, 5 snem phi la leh sat phi la pynhïar ïa ka ïoh ka kot ka jylla bad mynta ka jylla ka don hapdeng ka khim khait hynrei ki kam ba kin pynkiew ïa ka ïoh ka kot ha ka jylla kumno kin leh haba kin shu pyndap da ka ram na Sorkar Pdeng, ka ram na ka open market bad mynta ka la don ka jingma ban shah teh mraw ha ka ram ka shah”, u la bynrap.
“Nalor ba kim lah ban pynmih, lada ki shu kren kop ba peit ha ka jingtrei shitom ha ka MDA I bad mynta ha ka MDA II ngi la lah ban pynmih pisa na ka jylla lajong ngan thap kti bad ngan ym ïeng pyrshah ïa kane ka sorkar hynrei phi shu shim ram, bad mynta phi kren kop ai kata ka ram nalor ba ym lah pynmih sa ka bam kput, thung Chairman ïa u ba la rem election ruh”, u la ong.
U la bynrap, “Thung adviser, wat tang ha ka MLA ruh ym lah jop un leit ban ai jingmut aiu ïa u Myntri rangbah? Hynrei u ïoh ïa ka jingsiew ka ba heh ka umphiang ka ba 200 liter shibnai, baroh ki ba rem election ruh ki ïaid sharum shaneng da ka kali 01. Kane ka pynum ïa ka spah bad kaei ka ba lyngngoh ka long ïa ka jingnud jong ki ba la rem election ban pyndonkam bakla ïa ka bor, tang ba ki don ha ka party ka ba ïalam ïa ka sorkar ki leit ban buddien ïa ki skhim barim, haba u paidbah u la kyntait phi don hok aiu ïa kata ka skim kam dei ka skhim ka ba phi ai na ka pisa i mei i pa jong phi” .
“U leit buddien kumba u ai na ka pla lajong, u ba ai na ka pla lajong te ka dei hi ban buddien hynrei ïa kato ka dei ka skhim ba ai da ka sorkar bad ki paidbah ki la dep ban kyntait ïa me bad men donhok shuh ban buddien ai ka skhim sorkar ka la dei ka kamram u MLA mynta. Kane ka dei ka jingpyndonkam bakla ïa ka bor bad lada kine kin neh sa 5 -10 snem phi ang ka shyntur kin thep da kuli na shyntur ta ka daw u paidbah u dei ban jied aiu phin leh lada phim ïohi ïa kane kam myntoi ban khñium hadien ha bud”, u la ong u Bah Ardent.
“Ngin ïa khih ïa ka Reservation Policy bad ngin dawa ban weng ïa ki baroh ki ba bat ïa ka kam Chairman, da ki briew ki ba la rem election, namar ka dei ka pisa u paidbah kam dei ka pisa u Conrad ne u kpa Conrad”, u la bynrap.
