SHILLONG:
U kyrtong ka National People’s Party (NPP) Mawlai konstitwensi u ba dei ruh u MDC ka Mawlai u Bah Teiborlang Pathaw ha ryngkat bad ki nongïalam jong u, ki la leit ban ïa kynduh kyrpang ïa u MLA barim ka Mawlai u Bah SD Khongwir ban pan jingkyrkhu na ka bynta ka ilekshon sha ka ïingdorbar thawaiñ ka jylla ka ban sa long ha ka 27 tarik u Kyllalyngkot 2023.
Haba kren ha kane ka jingïakynduh lang u Bah Teiborlang Pathaw u la ïathuh ba u wan ban ïa kynduh kyrpang ïa u Bah SD Khongwir ban pan jingkyrkhu kyrdoh haba ïadei bad ka jingthmu kaba ki don na ka bynta kane ka ilekshon.
“U Bah SD khongwir u dei u Nongïalam uba la shakri bad kyntiew ïa ka shnong Mawlai , katne ka Mawlai ka kiew dei na ka jingïalam lynti ka jong u , kum u MLA ba nyngkong ka Mawlai,” ong u Bah Pathaw.
U la ong ruh ba na ka liang ka jong ki, kin bud ïa ki nuksa kiba u la leh kum u MLA bad lada ki poi sha ka thong kin hap ban pan jingmut na u na ka bynta ka roi ka par jong ka Mawlai.
U Bah SD Khongwir haba kren ha kane ka jingïakynduh u la ïathuh ïa ka jingrung jong u sha ka kam saiñ pyrthei ha kaba dei da ka jingai mynsiem jong i lok ba u shim ïa ka sien jam ban rung sha ka kam saiñ hima.
U Bah Khongwir u la ai jingmut ruh ïa ki nongïalam jong u Bah Teibor ba lada ki rung iing ki dei ban da nang ha ka ktien ka thylliej, bad lada ki rung ha ki iing kiba pynpaw ba kim lah ban ai jingkyrshan ïa u Bah Teibor kim dei ban dom.
“Man kiba wan ban ïa kynduh, nga ïalap beit ïa ki, da ki kren ïa ka subjek kaba pher na ka ilekshon nga pyrshang katba lah ban wan rah sha ka subjek khnang ba ngan ïoh ban ïathuh ïa ka kyrteng u rangbah uba nga jied,” u la ong.
U Bah Khongwir u la bynrap ruh da kaba ong, “Ïa u Bah Process ngam lah ban jied lano lano ruh em, dei na ki daw ki jong u hi.”
Ha ka sien ba nyngkong ba u jop u ong ba u jop hi, ha kito ki por bun kiba wan ïam bad sngewsih ba ngam ïaleh shuh.
U la kyrkhu kyrdoh ïa u Bah Teiborlang Pathaw, da kaba ong, “Nga ïohi ha u Bah Teibor ka ‘quality’ kum u nongïalam bad ym don u wei ruh u briew ha kane ka pyrthei u ban long u ba biang lut nadong sha dong.”
U la bynrap da kaba ong, u Bah Teibor u long u briew u ba biang ban mihkhmat ïa ka Mawlai Constituency , hynrei ka jingïaleh kam dei ban kheiñ stieng, dei ban trei shitom da kaba pynmih lut ïa kibor ki sor baroh.
U la ong ruh, “Bun ki briew kiba kylli ba ki wei ki la ïoh ban shna da ki iing paki dulan hynrei phi ka juh naduh ki 25 snem mynshuwa, nga ong sa rai ma phi nga long kumno.”
“Mynta ïa nga ym don u ba kdew kti ba nga bamsap, bad ngam tieng ïa katta namar ngam long kumta,” u la ong.
