SHILLONG:
Ha ka jingpan jingkyrshan na ka bynta ka kyrtong NPP jong ka Shillong parliamentary konstituensi, ka Ampareen Lyngdoh, ha kaba u general secretary ka seng bad u Symbud Myntri, u Sniawbhalang Dhar ha ka sngi palei u la kyrpad ïa ki nongïalam na Jaintia Hills ban pynthikna ba ka NPP kan pynkheiñ ïa ka rekod da kaba knieh ïa ka Shillong seat na ka Congress.
Ha ka jingpynbna shaphang ka jingïalang ba la pynïaid da katei ka seng ha Shillong, u Dhar u la ong kumne, “Ngi tip ba ka Shillong seat ka long kaba khlaiñ jong ka Congress ha kine ki snem ba la dep hynrei ngin pynkheiñ ïa ka rekod da kaba knieh ïa kane ka seat.”
U la ong ba baroh ki mutdur ba ka NPP kan nym don kyrtong na ka bynta Shillong seat hynrei mynta ka sngi “Ngi don ïa ka kyrtong, kaba biang ban mihkhmat na kane ka konstituensi.”
“Ka Ampareen ka la dep jop haduh san tylli ki ilekshon kynthup ïa ka bye election. Ka long ka Myntri ba la rangbah jong ngi bad ka wan na ka longïing longsem ban shakri ïa ki paidbah jong ka jylla bad ïa u kpa ba la khlad noh jong ka, u Bah Peter Garnette Marbaniang uba la noh synñiang shibun na ka bynta ka jylla bad ngi kwah ïa ka ba kan bud ïa ki dienjat jong u kpa jong ka bad ban bteng ban trei shitom na ka bynta jong ki paiadbah jong kane ka jylla,” bynrap u Dhar.
Shuh shuh, u Dhar u la ong ba ka vote na ka NPP ka dei kaba heh tam ha Meghalaya.
“Ha ka ilekshon ba la dep jong une u snem 2023, ka NPP ka la kot haduh 3.15 lak tylli ki vote. Lem bad ka jingwan ïasnoh jong ki ar ngut ki nongthaw aiñ na a seng PDF, kynthup ïa u Gavin Mylliem (Sohra) bad u Banteidor Lyngdoh (Mawkynrew), ka seng ka la kiew shaduh ka 3.50 lak tylli ki vote kat haduh mynta. Katba ka UDP ha kawei pat ka liang, ka la ïoh 2.90 lak tylli ki vote bad ka Congress bad ka VPP ka la kot haduh 1 lak tam ka vote. Te, phim dei ban duh jingkyrmen namar ba ngi heh ka vote watla ngi jop tang phra tylli ki seat (ha ka Ri Lum Khasi bad Jaintia),” ong u Dhar.
Shuh shuh, u Dhar u la ong ka NPP ka dei tang ka seng ba ïatylli lang.
“Ka seng jong ngi kaba hap hapoh ka jingïalam jong u Conrad K Sangma bad u Prestone Tynsong, ngi don tang kawei ha ka jingmut jong ngi, ngi long kawei. Ha ka NPP, kam don ka team A, team B team C. Ngi ïalong kawei. Kane ka long ka nuksa na ka bynta kiwei pat ki seng saiñ pyrthei,” ong u Dhar katba dang bynrap “Don kiba la kynnoh ba ka NPP ka dei ka seng jong u Garo hynrei kaei kaba kongsan ïaphi, ka long ka seng kaba la thaw ha Meghalaya ne ka seng ba shem shabar jong ka Meghalaya?”
Ha ka jingkam ba ka jingjop jong ka NPP ba lam da ka sorkar MDA ka long ka seng bym pyrkhing, ha kaba une u Symbud Myntri u la ong ba ha ki san snem shiteng ba la dep, ka la don ka jingjop ha kaba ïadei bad ki surok, ka um, ka bording bad ki health sector, kiba long kiba bun.
“Ka sorkar NPP ka la lah ban pynïoh ïa ki kor um sha ki 4 haduh 5 lak tylli ki longïing. Phim lah ban pynïanujor ïa ka kam jong ka sorkar Congress bad ka NPP, kaba la rim haduh san snem hakhmat ka sorkar. La don haduh 4,000 tylli ki self-help groups (SHG) ha ka por ba synshar ka Congress hynrei kat haduh san snem mynta, la don bun ki SHG ha Meghalaya kiba la kiew haduh 50,000. Kane ka long namar ba ka sorkar NPP ka dang pyrshang ban pynkiew ha ka jingpynïoh kam ïoh jam ïa ki samla ha kylleng ka jylla,” ong u Dhar.
U la ai jingïaroh ruh ïa u Myntri rangbah na ka bynta ka jinglah jong u ban wanrah haduh T. 20,000 klur halor ki externally aided projects (EAPs) sha ka jylla.
Kham mynshuwa, u nongthaw aiñ ka Jowai, u Wailadmiki Shylla u la kam ba un nym pynïoh bun ki vote na ka bynta ka Lyngdoh ban ïa ki vote ba u la ïoh ha ka por ba don ka ilekshon Assembly mynta u snem. “Nga kwah ban ïohi ba phi jop. Nga tharai ym don ba biang bad ba tbit ban mihkhmat na ka bynta jong ngi ha ka Ïing Dorbar Thawaiñ, kaba ym tang ba ka ai jingkren sha ki lad pathai khubor hynrei kaba dei ka briew ba kren shaphang ki mat ka kongsan hapoh ka Ïing Dorbar Thawaiñ,” ong u Dhar.
Ha katei ka jingïalang, la don bynta da u Myntri sorkar, u Bah Comingone Ymbon, ka MLA ka Sutnga-Saipung, ka Kong Santa Mary Shylla, u khlieh ka JHADC, u Thombor Shiwat, ki nongïalam ka seng bapher bapher bad ki nongtrei jong ki hynñiew tylli ki konstituensi jong ka Ri Lum Jaintia.
