SHILLONG:
Ki dak ki shin jong ka jingbym ïa sngewthuh jingmut hapoh ka People’s Democratic Front haba ïadei bad ka jingthmu ban khylliap Lama noh ïa ka seng bad ban pynïasoh sha ka National People’s Party ka la paw tyngkreiñ hadien ba u Vice President ka PDF u Bah James B Basaïawmoit u la leit ban aiti ïa ka shithi iehnoh kam ha u President ka PDF u Bah Gavin M Mylliem.
Haba ïakren bad ki nongthoh khubor hadien ba u la dep ban aiti ïa ka shithi iehnoh kam, u Bah James B Basaïawmoit u la ïathuh ba hynnin ka sngi na ka liang ka jong u, um shym la poi sha ka CEC kaba la pynlong da ka PDF, hynrei na ka liang ka jong u, haba u wat jingtip na ki para dkhot kila ïathuh ba baroh ki dkhot ka CEC ki la rai ban leit pynïasoh noh bad ka NPP.
“Ngam kwah ban dei u wei na ki ban khylliap noh ne ban pynlip ïa u Mombati bad ka bha ïa nga ban mih noh na ka seng,” u la ong.
U Bah Basaïawmoit u la bynrap da kaba ong, “Nga dei u briew uba sngew tynnad bha ban don ha ka seng riewlum, haba ngi thaw ïa ka seng, ngi ïohi ba ngi ïaid sha khmat ban kren ïa ki mat ban myntoi ki paidbah jong ka jylla.”
“Kine ha ka jaka ba ngin ïatrei, ki ong ba kim lah bor shuh, te lada ki ong ba kim lah bor shuh te ngin ïaleh kumno shuh hi,” ong u Bah Basaïawmoit.
Vice President ka PDF u la ther tyngeh da kaba ong, dei na kane ka daw watla ki paidbah ki ieid ïa ki seng riewlum, hynrei ka jingleh kulmar bad ka jingkynthih noh sha wei, ki briew ki sdang ban ngiah bad leit noh sha ki wei ki seng.
U la bynrap da kaba ong ba ïa mynta shipor un don shuwa marwei, un sa lum ïa ki paidbah, ban shim ïa karai.
“Ngin don arngut ki MLA hynrei kine ruh ki la pynpaw ba kim lah shuh ban dang pynïaid ïa ka seng, Nga marwei shaei ngan lah ban pynïaid ïa ka seng,” u la ong.
Tang ba shu pynkynmaw ba ha ka 2 tarik ki nongïalam ka CEC jong ka PDF ki la ïashong pyrkhat ban ïakren halor ka jingleit ban pynïasoh noh bad ka NPP, wat la ki nongïalam ka PDF ki kyntaid ïa ka khubor hynrei ka jingkren jong u VC President ka paw tyngkreiñ ba ki la dep shim ïa ka rai bad ha kine ki khyndiat sngi kin sa leit ban pynïasoh noh bad ka NPP.
