SHILLONG:
Ka saiñ hima sima ha ka jylla lane kata ka drama politik kumba ong ka ktien, la ïohi ba kat nang mih ki sngi ki por ka la nang itynnad bad ki don ruh ki khubor kiba kam ba ha ki sngi ban wan kan nang bun ka jingryngkang dieng kper lane ka jingphet ki MLA na kawei ka seng sha kawei pat. Kaba kham ïa bna paidbah bha mynta ka dei halor ka jinglah ban leit pynïasoh jong ki ar ngut ki MLA ka PDF sha ka NPP, hooid ha kaba wat na ka liang ki heh ka NPP ruh ki la kubur ba kan don kaba kum kane.
Ha kine ki khyndiat sngi la ïohi ruh ka la don ka jingkam ba ki MLA ka TMC ki don jingmut ban leit pynïasoh bad ka BJP hynrei kane kam pat long kaba shai haduh mynta, namar ka dang don ka jingkyntait na ka liang ki nongïalam ba heh ka BJP ba kan don kaba kum kata.
Ha kaba ïadei bad kane ka jingleit pynïasoh ki MLA ka PDF sha ka NPP, ka Central Executive Committee (CEC) jong ka People’s Democratic Party (PDF) ka la ïakynduh ha ka 02 tarik Jymmang ha ophis treikam ka seng ban shim ïa ka rai halor ka jingthmu ban pynïasoh noh bad ka National People’s Party (NPP).
Ki dkhot jong ka CEC kiba ïadon lang ki kynthup ïa ki arngut ki MLA, u President u Bah Gavin Miguel Mylliem bad u working President u Bah Banteidor Lyngdoh.
Lah ban kdew hangne ba ka NPP kala pynpaw ïa ka jingthrang ba kine ki arngut ki MLA kin wan ban pynïasoh noh bad ka seng ha shuwa ka sngi thep vote ha Sohïong kata ha shuwa ka 10 tarik mynta u bnai.
Haba kren bad ki Nongthoh khubor hadien ka jingïalang, u Working President ka PDF U la ong ba kin sa ai ka khubor kaba bha ha kine ki khyndiat sngi ki ban wan.
Haba kylli la ki don jingthmu ne em ban pynïasoh noh ïa ka seng bad ka NPP, u bah Lyngdoh u la buh jingkylli, “Mano ba ong ïa kata? Kam don eiei kaba kum kata. Kumno phin ong ïa kata haba ka lama jong ka PDF ka dang her sha jrong, kaei kaba ngi leh, ngi leh ha ryngkat ka jingïasngewthuh jingmut bad baroh. Hynrei ap phin sa ïoh ïa ka jingpyntip ha ka por kaba biang.”
Haba kylli la ki don ka jingïakren bad ka NPP, na ka liang u Working President ka PDF u la ong, “Haoid, ngi leh ïa kata man ka sngi, phin sa ïoh ka khubor ba bha ha kine ki sngi ki ban wan.”
Ha ka jingïalang paidbah jong ka seng ha Kran kaba hap hapoh ka Sohiong constituency, u national president ka NPP u Conrad Sangma u la ong ba kin don ki nongïalam jong kiwei ki seng saiñ pyrthei ki ban sa wan ban pynïasoh noh bad ka seng ha ka 6 tarik u Jymmang.
