SHILLONG:
U Bah Charles Marngar, MDC ka Mawhati konstitwensi u la phla paidbah ba u Bah Ngaitlang Dhar, uba dei u kpa jong u Bah Dasakhiatbha Lamare, MLA ba mynta ka National People’s Party (NPP) na Mawhati uba pynkhreh ban ïakhun noh ïa ka elekshon MLA 2023 na Nongkrem konstitwensi, u la wan ban thong ïa u ban ïakhun noh na ka seng NPP.
Haba kren ha ka jingïalang ba pynbna pura ïa u Bah S Osborne Kharjana kum u kyrtong ka Congress na Sohïong konstitwensi ha ka 20 tarik Nohprah, u Bah Charles u la kynthoh ruh ba ka jingphet ki MLA ka Congress ka long kumba hap ki sla ïaw na u dieng bad mih pat da kiba lung bad pynpaw ka jingkmen ba u Dr Mukul Sangma um don shuh ha ka Congress.
Une u nongïalam ka Congress na Ri Bhoi u la ong ba ki longkmie ha ki shnong Block II ki da ïam kthang mar ïa dep ïohi ïa ka jingkren u Symbud Myntri Rangbah ka Jylla, u Bah Prestone Tynsong uba la ong ba 22 tylli ki shnong ha Block II ki hap sha Assam.
U la ong ruh ba mynta ba la jan ka elekshon la ïa lymbub para kyrtong ha ki ïing ïap briew katba ha ki snem ba la dep pat ym ju ïohi bad ki kyrtong na kiwei ki party ki ai jingïarap pisa sha kiba khawai sngi kha ki khyllung ki khynnah.
Ki nongïalam ba ha khmat ka Meghalaya Pradesh Congress Committee (MPCC) ba kynthup ïa u Bah Pynshngain N Syiem, Bah JA Lyngdoh, u Bah Ronnie V Lyngdoh lem kiwei pat ki la kynther jem ïa ki seng saiñ-hima kiba ïa don lang ha ka Sorkar Meghalaya Democratic Alliance (MDA) ha ka jingïalam khmat ka National People’s Party (NPP) da kaba kynnoh ba kim don jingpyrkhat ïa ka biang ka bit ki paidbah hynrei ki lapmiet ban ïalum pisa na ka bynta ka jingmyntoi shimet jong ki.
Na ka liang u Bah Pynshngain N Syiem, MDC ka Mawkhar-Pynthorumkhrah u ban ïa aireng ha ka elekshon MLA 2023 na Pynthorumkhrah konstitwensi u la ong ba ka Secretariat ïa mynta hi ka la kylla long ka ktem ïa pyrkhat kam khaïi, ym shuh ban thaw ki lad ki lynti ban kyntiew ïa ki paidbah. U la ong ba ha ka por khlam COVID-19 ba ka Sorkar ka lut 800 klur tam ki MLA bad Myntri ki thied jaka thied ïing da ki klur tyngka.
Na ka liang u Bah JA Lyngdoh u ban ïa aireng na North Shillong, u la ong ki seng saiñ-hima kiba dei na ka Jylla ki leh ieid jaidbynriew hynrei kim lah ban leh eiei ruh khlem ka BJP lane NPP.
