MAIRANG:
Ki paidbah nongshong shnong na kylleng ki jaka jong ka Eastern West Khasi Hills District mynta ka 27 tarik u Rymphang 2023 ki la ïamih ryntih lang naduh dangstep ban leit thep ïa ka vote jong ki ha ki polling station ban pyndep ïala ka jong ka kamram bad ban pyndep ïa ka hok ban jied ïa ki nongmihkhmat kiba thymmai sha ka ïing dorbar thaw aiñ ka jylla.
Ha kane ka sngi ka jingwanpoi jong ki nongthep Vote hapoh ka Mairang Konstitwensi katkum ka jingïoh jingtip na ka tnad elekshon ki long 38,356 ngut (90.47%) bad ha Mawthadraishan Konstitwensi ki long 39,966 ngut (91.38%) bad kyllum lang baroh na ka Eastern West Khasi Hills District ki long 78,322 ngut (90.92%). Ki poling station kiba don hapoh ka District ki long baroh 141 tylli kaba kynthup 68 tylli ha Mairang bad 73 tylli hapoh Mawthadraishan Konstitwensi.
Ka jingïathep vote ha kine ki ar tylli ki Konstitwensi ka long kaba ïaid beit ïaid ryntih khlem kano kano ka jingthut bad la ïoh ruh ban sakhi ïa ki paidbah ba ki hap ban ap ïa u laiñ na ka bynta ban ïoh ïala ka pali ban thep vote watla kata ki don ruh ki poling station kiba ki paidbah ki duna ban ïeng ap laiñ.
Ha kane ka sngi la sakhi ruh ïa ka jingdon jong ki bor pahara ha man la ki poling station na ka bynta ban peit ïa ka jingïaid beit iaid ryntih jong ka jingthep vote khlem kano kano ka jingpynwit lane ka jinghuri hura ïa kaba la sakhi naduh ka por 7 baje mynstep haduh ka por 4 baje janmiet.
