NEW DELHI:
Ka Bharatiya Janata Party (BJP) kan ïakhun na baroh 60 tylli ki Konstitwensi ha kane ka elekshon ka ban sa thep vote ha 27 tarik Rymphang 2023. Ka seng ka la pyllait ruh ïa ka thup kyrteng jong baroh ki kyrtong ki ban ïakhun na 60 tylli ki Konstitwensi.
Haba pynshai sha ki lad pathai khubor ha ka 2 tarik Rymphang hapoh ka Nongbah Delhi, u National Secretary ka seng u Rituraj Sinha u la ong ba ha ka sien ba nyngkong, ka BJP high command ka la rai ban ïakhun na baroh 60 tylli ki Konstitwensi hapoh ka jylla Meghalaya ryngkat ka tien phira “Ban pynkupbor ïa ka Meghalaya” lane “Empower Meghalaya”.
U Sinha u la ong, “Da ki snem, ka saiñ hima sima hapoh ka jylla Meghalaya ka la shah ñion ha ka Congress bad ha ki phew snem ba la leit, haba ïa nujor ïa ka jylla Meghalaya bad kiwei pat ki jylla hapoh ka Northeast bad ha baroh kawei ka Ri, lah ban ïohi ba ka duna bha ka roi ka par”.
“Ki paidbah ka jylla Meghalaya mynta ki la ngiah ïa ka jingbamsap bad ka jingsuki ban kiew ha ka roi ka par hapoh ka jylla. Wat mynta, ka jylla Meghalaya ka mad ïa ka jingduk jingkyrduh na ka daw ka jingbym lah ban pynïasoh ïa ki thaiñ nongkyndong, ka jingduh bording bad ka jingbym biang ha ki lad ai jingsumar”, u Sinha u la bynrap.
U Sinha u la kdew ba ki paidbah ka Meghalaya ki la pdiang ïa ka seng bad tang ka BJP ka dei ka lad ba lah ban nang pynkhlaiñ ïa ka Meghalaya.
Haba pynbna ïa ka kyrteng jong ki kyrtong, u President ka BJP Meghalaya, u Bah Ernest Mawrie u la ong ba ha u snem 2018, ka BJP ka la ïakhun na 47 tylli ki Konstitwensi hynrei ki la jop tang 2 tylli ki shuki. “Mynta ka kynti, ka seng ka shan khmat ban pynjop kham bun ki shuki na Khasi-Jaiñtia bad Garo Hills”, u la bynrap.
