SHILLONG:
U Vice President ka United Democratic Party (UDP) u Bah Allantry F.Dkhar u la kynnoh ba ka seng Bharatiya Janata Party (BJP) ka la pyndonkam ïa ka jingdawa Inner Line Permit (ILP) kum ka mat elekshon khnang ban ïoh ban khring ïa ki vote jong ki paid nongshong shnong ka jylla.
Haba kren sha ki lad pathai khubor u Bah Allantry u la kynnoh ba bun na ki nongïalam ka BJP ki la dep ban pan ka jingkyrshan na ki paidbah ka jylla, lada ki kwah ban ïoh ILP. “Ka BJP ka la dep ban pan ka jingkyrshan na ki paidbah ba lada ka wan ha ka bor kan pynïoh ïa ka ILP hapoh ka jylla Meghalaya. Ka BJP ka pyndonkam da ka mat ILP tang ban khring ïa ka vote jong ki paidbah ha kane ka jylla”, la ong u Bah Allantry.
U Bah Allantry u la ong ba ki paidbah ki la dep ïohi ïa ka buit jong ka BJP bad ïa ka jubab yn sa ai ha ka 2 tarik u Lber, 2023.
