NEW DELHI:
Ka Election Commission jong ka Ri India (ECI) ha ka jingïalang kaba la pynlong ha Rang Bhawan Auditorium, New Delhi ha ka janmiet jong ka 18 tarik Kyllalyngkot, ka la pynbna ba ka sngi thep vote hapoh ka jylla Meghalaya kan long ha ka 27 tarik Rymphang 2023, kaba hap ha ka sngi nyngkong jong ka taïew.
Ka ECI ka la pynbna ruh ba ka jylla Nagaland kan pynlong ïa ka jingthep vote ha kajuh ka tarik bad ka jylla Meghalaya, katba ka jylla Tripura pat kan pynlong ïa ka jingthep vote ha ka 16 tarik Rymphang 2023.
Shuh shuh ka ECI ka la pynbna ba ka jingñiew ïa ki vote bad ka jingpynbna ïa ki nongjop kan long ha kajuh ka sngi ha baroh lai tylli ki jylla, kata ha ka 2 tarik Lber 2023.
Ka tarik ba kut ka jingthep kyrteng na ka bynta ki kyrtong kiban ïakhun ïa ka elekshon 2023 ha ka jylla Meghalaya kan long ha ka 7 tarik Rymphang 2023 bad ka sngi ban shong bishar halor ki kyrteng ki kyrtong kan long ha ka 8 tarik Rymphang 2023. Ka ECI ka la bynrap ba ka tarik ba kut ka jingweng noh ïa ka kyteng ki kyrtong kan long ha ka 10 tarik Rymphang 2023.
