SHILLONG:
Ka Voice of the People Party (VPP) ha ka 16 tarik Kyllalyngkot ha ka jingïalang paidbah kaba la long ha Madan Polo, ka la pynbna ïa ka thup kyrteng baar jong ki kyrtong ki ban ïa khun ïa ka election 2023 na kane ka seng.
Kine ki ar ngut ki kyrtong kiba ka seng ka la pynbna ki kynthup ïa u Bah Adelbert Nongrum, u MLA barim ka North Shillong Konstitwensi, bad u Mayborn Lyngdoh u nongïalam jong ki kynhun nonghikai FASTOM.
U Bah Adelbert u la jop ïa ka MLA elekshon 2018 na ka seng saiñ pyrthei KHNAM bad u la ieh ïa ka jinglong MLA dang shen bad pynïasoh ïalade sha ka VPP ha kane ka sngi, bad u long ruh u kyrtong ka VPP na North Shillong Konstitwensi.
U Bah Mayborn u dei u nonghikai bad u nongïalam jong ka Federation of All School Teachers of Meghalaya (FASTOM) un dei u kyrtong ka VPP na Pynthorumkhrah Konstitwensi.
Lah ban kdew hangne ba ka VPP haduh mynta ka la dep ban pynbna ïa ki 16 ngut ki kyrtong ki ban ïa khun ïa ka elekshon 2023 kynthup ïa ki 14 ngut kiba ka la dep ban pynbna dang shen.
Kine ki kyrtong ki kynthup ïa u VPP president bad u MLA barim ka Nongkrem Konstitwensi u Bah Ardent Miller Basaiawmoit na Nongkrem, u Bah Adelbert Nongrum na North Shillong, u Bah Mayborn Lyngdoh na Pynthorumkhrah, ka Kong Aibandaplin F Lyngdoh na Mylliem, u Bah Damewanhii L Rymbai na Khliehriat, u Dr Ricky AJ Syngkon na Umsning, u Bah Heavingstone Kharpran na Mawryngkneng, u Bah Brightstarwell Marbaniang na Mawlai, u Bah Avner Pariat na East Shillong, u Bah Raja Jyrwa na West Shillong, u Bah Danny Langstieh na South Shillong, u Bah Winston Tony Lyngdoh na Nongthymmai, u Bah Doristar Marbaniang na Mawphlang, u Bah Manbhalang Thabah na Pynursla, u Bah Shanlang Warjri na Mairang, bad u Bah Overlin Imiong na Ranikor.
Ha kane ka sngi ka VPP ka la pynlong ïa ka jingïalang paidbah ban pdiang ïa u Bah Adelbert Nongrum bad u Bah Mayborn Lyngdoh ki ba la wan ban pynïasoh pura sha ka party VPP, ha ka jingïalang kaba la long ha Madan Polo. La pdiang ïa kine ki ar ngut da u President ka VPP u Bah Ardent Miller Basaiawmoit, bad ïa ka thup kyrteng baar la pynbna da u Chairman ka SEC u Dr Kara H Shen.
Ha kane ka sngi da ki hajar ngut ki nongkyrshan kane ka party ki la wan ban ïashim bynta ha kane ka jingïalang jong ka party VPP, bad noh synniang pisa ruh sha kane ka party ynda la dep ka jingïalang.
Ha kaba ïadei bad ka shap jong ka party, u President u la ong ba ka party kam pat lah ban ïoh ïa ka shap bad yn ïoh hadien ar taïew.
