SHILLONG:
Ki nongïalam jong ka National People’s Party (NPP) ha ka sngi saitjaiñ ba la dep ki la hiar sha Mawkynrew ban ïashim bynta ha ka jingïalang paidbah jong ka seng.
Ha kane ka sngi la pynbna ïa ka kyrteng jong u Bah Kansing Lyngshiang kum u kyrtong u ban ïa aireng na ka Mawkynrew konstitwensi ha kane ka elekshon ka ban wan.
La pdiang burom ïa u Bah Kansing da u National President ka seng, u Conrad K Sangma uba dei ruh u myntri rangbah ka jylla. Ha kane ka sngi la ïadonlang ruh u National Vice President uba dei u symbud myntri rangbah ka jylla, u Bah Prestone Tynsong, ha kaba da ki hajar ngut ki paidbah nongkyrshan ki la wan ban sakhi lang.
Haba kren ha kane ka sngi, u Conrad Sangma u la kob da kaba ong ba ka jingjop na Mawkynrew konstitwensi, kan pyntikna ïa ka NPP ba kan jop bun jaka ha kane ka MLA elekshon kaban wan bad ka don ka jingkyrmen ban synshar marwei.
“Ka jingwan pynïasoh jong ki nongïalam sha ka seng ka pyni ba ka NPP ka la nang kiew katba nang mih ki sngi bad kane ka pynpaw bad pyntikna ba seng kan dang jop bun shuh shuh ha kane ka elekshon 2023,” la ong u National President.
Na ka liang u Bah Prestone Tynsong, haba kren ha kane ka sngi, u la ong ka jingwan ïashim bynta jong ki paidbah sha ka jingïalang ka ai mynsiem bad pynshngaiñ ïa ka seng ba kan poi sha ka thong.
U la pynshai ruh haba ïadei bad ka dawai sboh, u la ong, “ki don ka jingkyrmen ba naduh u bnai Nohprah mynta u snem, ki paidbha kin ïoh noh ïa ki dawai sboh ryngkat ka subsidy. Da kane ngi don ka jingkyrmen ba ka rep ka riang kan kiew biang ha ka jylla.”
“Shuwa ba ka sorkar kan rai, ka la don ka jingwan ïakynduh jong u Bah Kansing ha ryngkat ka kynhun nongrep na East Khasi Hills haba ïadei bad ka dawai sboh, kaba ki paidbah nongrep ki shem shitom ban ïoh bad ka dor ruh ka rem bha,” u la ong.
U la bynrap da kaba ong ba naduh ba la bthah ïa ki paidbah nongrep ban sdang noh da ka rep khlem dawai sboh; ka jingmih jong ki mar rep ka hiar bha. Dei na kane ka daw ba ka sorkar ka la shim ïa ka rai ban ailad biang ban pyndonkam ïa ka dawai sboh.
Ha kane ka sngi la ïadonlang ruh kiwei ki nongïalam jong ka NPP, kynthup naduh u President bad General Secretary jong ka NPP East Khasi Hills, u Bah Jied Kurbah bad u Bah Aibor Tynsong, nangta ki MDC ba kynthup ïa u Bah Lamphrang Blah bad u Bah Bajop Pyngrope nalor kiwei kiwei.
