SHILLONG:
U Myntri Rangbah ka jylla u Conrad K Sangma, ha ka 7 tarik Kyllalyngkot u la pynbna ïa u Bah Hamletson Dohling, kum u kyrtong jong ka National People’s Party (NPP) u ban aireng ïa ka election 2023 na Mylliem konstitwensi.
Haba ïakren ha kane ka jingïalang ban pdiang ïa u Bah Hamletson Dohling sha ka party NPP u Conrad K Sangma u la ong ki nong Mylliem ki la leh ïa kaba dei ban jied ïa u Bah Hamletson kum u nongmihkhmat jong ki, bad mynta ka sngi ka jingwanbud jong ki hajar ngut ki nongkyrshan ka PDF ban pynïasoh sha ka NPP ka paw ba ki paidbah ki shaniah ïa ka jingïalam jong u.
“U Bah Hamlet u dei u briew u bym ju khlet ïa la ka jingkular, u ïai buddien ïa ki mat jingeh la ka dei ka ILP, ka jingpynbeit ïa u pud u sam lane ka mat shaphang u Uranium, kiba dei ki mat ba u ju ïeng naduh ba u dang don ha ka KSU haduh mynta, bun ki briew ki ju kylla haba ki la ïoh ban rung ha ki kam saiñpyrthei hynrei u Bah Hamlet u long u ba shai ba ka jingwan rung jong u sha ka lyngpung saiñpyrthei ka long ban rah shakhmat ïa kine ki mat bad kane ka dei ka dak ba u dei u nongïalam ba shisha”, la ong u Conrad.
U Myntri Rangbah u la ong ruh ba da ka jingwan rung u Bah Hamletson Dohling ha kane ka sngi, ka la nang pynkhlaiñ shuh shuh ïa ka party bad u don ka jingshaniah ka ba skhem ba ha u snem 2023 ka NPP kan wan marwei ha ka bor ban shynshar ïa ka jylla.
U Myntri Rangbah u la pdiang ruh ïa u President barim ka PDF u Bah Ivan Marbaniang, u General Secretary barim ka PDF u Emlang Latang bad u Chief Organizer barim PDF u Bah D Ryngtathiang ki ba la wanlang ban pynïasoh ïalade ha kane ka sngi sha ka party NPP.
