SHILLONG:
U MLA ka Mawlai Constituency u bah Process T Sawkmie u la kynnoh ba ka jingbym don ka shong suk shong shngain ha ka jylla, kam dei na ka jingtlot u bah Lahkmen Rymbui kum u Myntri ka tnad kam pohïing jong ka sorkar jylla hynrei dei na ka jingkwah pyniaid marwei jong u Myntri rangbah ka jylla u Conrad K Sangma ia ki tnad sorkar baroh.
Haba iakren bad ki lad pathai khubor, u bah Process u la ong ba ka jingjia ha ka shnong Mukroh kala pynmih sa ka jingeh na ka jingmih ka jingkulmar ha baroh kawei ka jylla hynrei ka long kaba kmen ban iohi ba ka shong shngain shong shngain ha ka jylla ka la nang wanphai.
Kan shong ha ki sengbhalang, ki nongmihkhmat, ki nongialam niam ki nongialam shnong bad ki samla ba kin trei shitom lang ban wanrah ka jingsuk ha ka jylla bad la khmih lynti ruh ba ka jingtohkit CBI kan ai kloi ka kaiphot jingtohkit jong ka.
“Ha kaba iadei bad ka jingjia ha ka shnong Mukroh ngim lah ban kdew kti tang ia ka tnad pulit hynrei ka dei na ka sorkar MDA bad ka NPP kaba ialam ia ka sorkar kaba tlot”, la kam u bah Process.
“U nongialam ka NPP, uba khlieh duh, uba ialam bad ki myntri baroh kin hap ap ia ka jingbthah na u Myntri Rangbah ka jylla ban shim kano kano ka sienjam hynrei ha ka jylla baroh, ki kam ki jam la shimti hi u Myntri rangbah ka jylla bad ki Myntri kim lah ban shim kano kano ka rai bad kane ka lah ban long ba u Myntri ka tnad kam pohïing um ju lah shuh ban shim kano kano ka rai namar baroh ki kam la shimti hi Myntri Rangbah kumba ka paw na kane ka jingjia”, u la kynnoh.
Ha kaba iadei bad ka jingpynbeit ia u pud u sam, u la ong ba ka Sorkar mynta ka khlem shim khia ban pynbeit u pud u sam, bad kane ka jingjia ha Mukroh ka dei na kane namar ba kam don ka jingshimkhia ha kine ki 5 snem.
U la bynrap shuh shuh, “Man ba don ka dorbar ha kine ki san snem, ngi ju rah ia ka mat u pud u sam ban ia kren bad ngi ju kyntu ia ka sorkar halor kane ka bynta bad kumjuh halor ka roi ka par, ka jingbuh Outpost, hynrei kaei kaba ngi kren ka long lehnoh ei bad kane ka jingjia ka dei ba ki khlem shimkhia”.
Halor ka rai ka sorkar ban buh ia ki BOP sha kine ki thain ha khappud, u la ong ba ka dei ban ai ia ka jingiaroh hynrei ka sorkar ka donkam ban shimkhia noh mardor shwa ba ka Election Commission kan pynbna ia ka elekshon ha ka jylla bad lada sorkar ka shimkhia, donkam ban leh da ka kam ban pynthikna ia kane ka jingkular.
