SHILLONG:
U President barim ka People’s Democratic Party (PDF) na Mylliem u Bah Gilbert Laloo, u la pynïasoh noh ïa lade sha ka All India Trinamool Congress (AITC) ha ka 15 tarik Nohprah 2022. U President ka seng u Bah Charles Pyngrope, u la pdiang burom ïa u Bah Gilbert sha ka seng ha ka jingïadon lang u Vice President u Bah James Lyngdoh bad u President ka TMC Mylliem Block u samla Samuel Hashah.
Haba kren ha kane ka jingïalang, u Bah Laloo u la ong hadien ka jingïaid lynti da ki snem bad ka jingdon ha ki seng bapher bapher, ka la don ka jingïarai lang bad ki nongkyrshan ban pynïasoh noh bad ka TMC.
U Bah Laloo u la ïathuh ruh ba ki nongkyrshan jong ka Mylliem ki la shim ïa kane ka rai ban wan pynïasoh bad ka TMC namar ki sngew tynnad ban don bad ka seng kaba heh bad khamtam kaba dei ka seng kaba dang khuid dang suba ka bym don bynta eiei bad ka sorkar MDA.
U Bah Laloo u la bynrap ba ïa ki mat halor ka sorkar MDA kin sa ïakren ha kiwei pat ki rynsan bad u don ka jingsngew kaba skhem ba ka TMC kan sa synshar ha u snem 2023 hapoh ka jingïalam jong u President ka seng.
U Bah Laloo u la ïaroh ruh ïa ka Myntri Rangbah ka jylla West Bengal kaba la wan rah shibun ki kam pynroi ha ka jylla wat la ka long ka jylla kaba heh bad u don ka jingngeit ban ïoh pynurlong ïa ka jingthmu jong ka seng khamtam ha ka jylla kaba rit kum ka jylla Meghalaya.
Na ka liang u President ka seng u Bah Charles Pyngrope u la kyntu ïa ki nongïalam ka seng na Mylliem ban trei shitom ban ïoh ïa u soh ka jingjop.
U la ong ruh, “leit sha ki paidbah da kaba sngewrit, kynmaw ba haba phi leit sha u paidbah phim dei ki kynrad hynrei phi dei ki shakri kiba phi hap ban peit na ka bynta ka jong ki”.
