NONGSTOIÑ:
Ka Seng Hynñiewtrep Youth Council (HYC), West Khasi Hills District, ha ka 23 tarik Rymphang ka la pynlong ïa ka jingïalang ai jingpynshai paidbah kaba ki la jer kum ka Rai Eh Daw Campaign.
Ka Seng ka la pynlong ruh da ka jingïaid paidbah da ki kali kaba la sdang na ka shnong Sohpian haduh ban da poi ha Ladweitang ka jaka ba pynlong ïa ka jingïalang paidbah.
Ha kane ka sngi la ïadon ryngkat lang ruh ki nongïalam ka ka HYC Seng kmie kiba kynthup ïa u President ka Seng u Bah Robertjune Kharjahrin, u General Secretary ka seng u Bah Roykupar Synrem, u Bah Donbok Kharlyngdoh, ka samla Bari Pyngrope bad kiwei kiwei.
Ki nongïalam ba rangbah jong ka Seng HYC Sengkmie haba ai jingkren ha katei ka jingïalang ki la pynshai halor kumno ban wanrah ïa ka synshar khadar kaba khuid da kaba shim ïa ka jingkitkhlieh ban jied ïa ki nongmih khmat sha ka ïing dorbar thaw aiñ ka Jylla ka ban sa long ha ka 27 tarik mynta u bnai.
