NONGPOH:
Ha ka kyrwoh kaba la phah da ki nongïalam ka NPP Nongpoh Block, kiba kynthup ïa u Bah Lawrence Nongrum, Secretary ka NPP Nongpoh Block, nangta kiwei kiba kynthup ïa u Bah Rayonald Kharkamni, u bah Stoin R. Syngkli bad u Bah Minsing Makri, kiba dei kum ki Working President NPP Nongpoh Block, ki la pynrem jur halor ka jingkren laplah u Bah Plielad Tiewsoh, ha kaba katei ka jingkren jong utei u rangbah ka long kaba khlem nongrim bad ka bym don ïa ka jingshisha ka dei tang ka jingkwah ban pyn sngewthuh bakla ïa ki paitbah ka Nongpoh konstitwensi bad kaba dei tang ka nia elekshon.
Haba ïadei bad katei ka jingshah kynnoh, kitei ki nongïalam ka NPP, ki la pynshai, da kaba ong ba ha ka 05-12-2022, u Bah Plielad Tiewsoh u la shah sospon 6 bnai (Document enclosed) na baroh ki rank and file jong ka seng NPP bad ngi kwah ba un ai ïa ka jubab sha ki paidbah balei ba u lah shah sospon wat tang hadien 7 bnai eiei ba u la wan ban pynïasoh shaka seng NPP? Na ka liang ka seng ngim kwah ban thad ïa utei u rangbah haba ka seng ka la sospon ïa u hynrei ngi burom ïa ka long rynïeng jong u bad ngi khlem la ai shaki lad pathai khubor.
Halor ka jingkam u Bah Plielad Tiewsoh, kum u President ka NPP Nongpoh Block ka long kaba bakla bad khlem nongrim namar katkum ka riti treikam jong ka seng NPP ïa ki Block President la thung (Appoint) da ki District President bad u President ka District NPP, u la dep ban thung (Appoint) ïa ka Kong Macdalyne S Mawlong kum ka President jong ka NPP Nongpoh Block ha ka 26-02-2022 (Appointment Enclosed) bad haduh mynta ka Kong Macdalyne S Mawlong, ka dang dei hi ka President jong ka NPP Nongpoh Block.
Halor ka jingkynnoh, ba ka kyrtong ka NPP na Nongpoh kam pat long ka nongïalam ba shemphang bad ba kam pat lah ban shim rai nalade, kitei ki nongïalam, ki la pynshai da kaba ong ba ka Kong Macdalyne S Mawlong, ka la dei lypa ka nongmihkhmat paitbah bad kum ka MDC & EM ha KHADC bad ka jing kynnoh jong utei u riew shimet kam shong nongrim bad ka dei tang ka nia pynthohbria elekshon, kitei ki nongïalam ki la kyrpad ïa ki paidbah ba kim dei ban shah ïalam bakla ha u riew shim kabu elekshon, namar ki tip bha ba utei u rangbah u dei uba kumno , ha kaba u la shait ïashimbynta bynta ha ki jingïakhun ban long nongïalam shnong kynti kiba u la ïakhun u lah shah kyntait ha ki paitbah bad uba la ïakhun teng ha ka election MDC ngi kwah ban pynkynmaw biang ïa ki paitbah ba katno vote ba u ïoh haba u ïakhun.
U Bah Plielad Tiewsoh, u la wan ban pynïasoh sha ka seng NPP ha ka 12-04-2022 bad ka dawbah jong ka jingwan ban pynïasoh ka long namar ba utei u rangbah um don jaka shuh ban rieh bad u la duh ïa ka jingshaniah ha ka seng kaba u don mynshwa bad ka jingkren jong u Bah Plielad Tiewsoh, ka paw shai ba u long u agent jong no re jong no.
Ka jingmih u Bah Plielad Tiewsoh hadien ka jingshah sospon, kan ym don kano kano ka jingktah ïa ka seng NPP Nongpoh, namar utei u rangbah u la pynkulmar jingmut ïa ki ba bun ki nongkitkam ka seng bad mano ba lah ban shaniah ïa u briew u ba kylla khlieh khlieh tdong tdong, kumba ka ktien tymmen ka ong bad hadein ka jingmih jong u bah Plielad Tiewsoh kiba bun ki paralok kiba la wan ban pynïasoh sha ka seng NPP khamtam lei lei na ka thaiñ Nongpoh.
Na ka liang ka seng NPP Nongpoh Block, ka ai ïa ka jingkitbok ïa utei u rangbah namar ka jingmih jong u na ka seng NPP ka la long pynban ka jingkyrkhu ïa ka seng NPP Nongpoh Block, namar ba utei u rangbah u long uba la bun daw palat bad na ka liang jong ki nongkitkam ka seng NPP Nongpoh, ka ai ïa ka jingshaniah kaba skhem hapoh ka jingïalang ka Kong Macdalyne S Mawlong bad kiba la kyrmen ban kan poi sha ka thong ha u 2023.
