SHILLONG:
U President ka United Democratic Party (UDP), u Bah Metbah Lyngdoh, ha ka 6 tarik Lber u la ong ba ki hap ban pdiang ïa ka jingtyrwa ka National People’s Party (NPP) ban ai ka jingkyrshan hadien ba ka UDP kam shym la lah ban ïoh ïa ki nombar ban thaw ïa ka sorkar ban lam khmat da ki seng riewlum ha ka jylla Meghalaya.
“Ka rai jong ki paidbah ka pynphalang ïa ka mon jong ki na ka bynta ki seng riewlum ban thaw ïa ka sorkar namar dei tang ka seng UDP kaba ïoh 11 ngut ki MLA na Khasi-Jaiñtia Hills. Ngi la pyrshang ban thaw ïa ka sorkar ha kajuh ka sngi (2 tarik Lber) hynrei ngim dap ki nombar. Ki shuki ba la jop da ki seng riewlum ki long tang 19 tylli bad ngi donkam ka jingkyrshan na ki national party kum ka TMC bad ka Congress,” u la batai.
Shuh shuh, u Bah Lyngdoh u la ïathuh ba ha ka 3 tarik Lber haba ki ïakynduh ïa ki nongïalam jong kiwei ki seng saiñ pyrthei, ki don haduh 30 ngut ki MLA ha ka liang jong ki hynrei ha kaba kut ka sngi, ki duh noh 3 ngut ki MLA bad ka jingdon ki MLA ka la hiar sha ka 27 ngut.
“Ha kato ka sngi, la pynthikna ha ngi da u President jong kawei ka seng saiñ pyrthei ba ki MLA kiba la leit ai jingkyrshan sha kawei pat ka liang (NPP) kin wanphai. Ngi la ap hynrei kim shym la wanphai,” u la bynrap.
Hadien ba ki la sngewthuh ba kim lah ban kot ïa u nombar ban thaw sorkar, u Bah Lyngdoh u la ong ba ka NPP ka la dep khot ïa ki hynrei ka UDP ka dang ap ïa ka jingwanphai ki 3 ngut ki MLA. “Ngi la ap hynrei kam shym la jia long, kumta ngi la pdiang noh ïa ka jingtyrwa jong ka NPP,” la pynshai u nongïalam ka UDP.
Haba kylli hato ka UDP ka la pan ïa ka shuki Symbud Myntri Rangbah, u Bah Lyngdoh u la ong, “Ngi dang ïakren halor kane ka bynta bad ha kaba ïadei bad ka shuki Lamphang, ka jingïakren ka dang ïaid.”
