MAIRANG:
U President rangbah ka seng United Democratic Party (UDP) uba dei ruh u kyrtong jong ka seng na Mairang Konstitwensi, u Bah Metbah Lyngdoh, ha ka jingleit ïalap elekshon ka jong u ha ka rynsan ïenglang kaba la pynlong bad pynïaid da ka dorbar shnong Nongkhlaw ha ka 23 tarik Rymphang ha ïew Nongkhlaw ula pynshai sha ki paidbah ba ka Jingmut jong ka district ka long ban wanrah ïa ki tnad treikam bapher bapher, ïa ki Ophis treikam jong ka Sorkar kiba don ha ka district level kiba baroh shi katta bad kiba dang don mynta ha Nongstoiñ baroh kine kin sdang ban treikam noh hapoh Mairang. Ka jingwanrah ïa ka district ha Mairang ka long ban pynsuk ïa ka leit ka wan jong ki paidbah ha kaba kim donkam shuh ban leit sha ki thaiñ Nongstoiñ bad ruh sha Shillong ban pyndep ïa ki kam ki jong ki.
“La bun palat ki jingïalam bakla jong ki nongïalam jong ka seng Congress ban ïalap elekshon, na kata ka daw naduh 2008 kajuh shi kajuh ka rukom ïalap elekshon haduh mynta da kaba burom ka Congress kan nym jop elekshon lano lano ruh hapoh Mairang,” kop u Bah Metbah.
Ula ong ruh ba ha kane ka kynti ki paidbah ki la dep ban shim ïa ka rai ha ka seng UDP namar ba ki paidbah ki la sngewthuh bad ula pynpaw ïa ka jingssngewkmen ba ha man ba u leit ban ïalap elekshon ha ki jaka ha ki iew kiba don ha kane ka Konstitwensi ki paidbah wan ban ïasynran lang ban pynshngaiñ ïa u bad kane kane ka pynpaw ïa ka jingsngew nguh bad ka pynpaw ruh ïa ka rukom pyrkhat kaba la ïar nang shai bad nang bha ba ki paidbah jong ka Mairang kin ym shah ïalam bakla shuh.
Shuh shuh ula pynpaw ruh ïa ka jingsngew sih halor ka jingwanrah ïa ki khubor kiba ong ba ka district ha Mairang ka wan hi namar ba ka la dei ka pali jong ka Mairang ba kan ïoh ïa ka district, ym tang ïa kata hynrei ïa ka surok ruh kaba ki ong ba ka wan hi, “Ki kam kiba nga lah pyrshang ban leh na ka bynta ka jingmyntoi u paidbah hato ka long kaba bakla?” kylli u Bah Metbah.
Ula ong ruh ba ka jingwanrah ka jong u ïa ki surok ka long ka kamram ka jong u kum u nongmihkhmat bad un ïaleh kat kaba lah ban wad ïa ki lad ki lynti na ka bynta ban wanrah ïa ki jingdonkam hapoh ka Mairang Konstitwensi.
