MAIRANG:
Ka seng United Democratic Party (UDP) ha ka 19 tarik Nohprah ka la ïoh ban jied bad pynskhem ïa ki nongkitkam kiba pura jong ka UDP Youth Wing Eastern West Khasi Hills District ha ka jingïalang kaba la pynlong ha phyllaw ïing treikam jong ka seng kaba don ha Mission Mairang.
Ïa kitei ki nongkitkam la pynskhem u President ka Youth Wing Meghalaya u Bah Kyrmen Shylla uba long u Myntri ka sorkar jylla ha ka jingdonlang u President ka seng u Bah Metbah Lyngdoh uba dei ruh ha kajuh ka por u MLA jong ka Mairang konstitwensi lem bad ka jingïasakhi lang jong ki spah ngut ki nongkyrshan ka seng na baroh ar tylli ki konstitwensi kata ka kynthup ïa ka Mawthadraishan bad ka Mairang konstitwensi.
U Bah Kyrmen haba kren ha katei ka jingïalang ula ong ba ka jingpynskhem ïa kine ki nongkitkam ka long ban kham pynkhlaiñ shuh shuh ïa ka seng ba kum ki samla kin nang ïai trei kham bha ban pynjop ïa ki ar ngut ki kyrtong kiba kynthup ïa u Bah Metbah Lyngdoh na Mairang Konstitwensi bad u Bah H.Brolding Nongsiej na Mawthadraishan Konstitwensi bad ka jingjied ïa kine ki nongkitkam ka long ban ai ruh ïa ka jingkyrshan kaba pura ïa kitei ki rangbah bad lada ai ka jingkyrshan kaba long shi spah percent kin ïoh beit ïa ka jingjop ha une une u snem u ban wan.
“Ha ka elekshon tang uwei u nongjop ym don ba nyngkong ne baar bad tang uba ïoh ïa ka kyrdan kaba nyngkong un ïoh bat ïa ka kam namar kata ka donkam ban treishitom ban ai lut shispah percent khnang ba kin ïoh ïa ka jingjop”, la ong u Ma Kyrmen bad ula kyntu ruh ïa ki samla ba kin ym trei tang na ka bynta kiba hapoh ka District hynrei na ka bynta jong kiwei ruh ki kyrtong kiba na kiwei pat ki District ban ïa saphriang lang ïa ki khubor lyngba ki social media.
Katba u Bah Metbah Lyngdoh ula ong ba ka elekshon ha une u snem 2023 kan long ka elekshon kaba khampher ban ïa ki snem kiba la dep namar ba ha ki snem kiba la dep ka duna bha ka jingïadon bynta lang jong ki samla bad ha ka jingkynkhreh ïa ka elekshon ha u snem 2023 ki don bun bha ki samla kiba la mih sha khmat ban ïashim bynta lang ha kane ka elekshon.
U Bah Metbah ula kyntu ruh ïa ki samla kiba la shah pynskhem ha katei ka sngi ba kidei ban kong kiba don ka mynsiem kaba sngewrit ka mynsiem kaba ïajan bad ki paidbah kum ki nongïalam kiba ha khmat ki ban pynthikna ba ka kam kan ïaid beit ïaid ryntih ban ïoh kheit ïa u soh jong ka jingjop bad ula ai ruh ïa ka jingkitbok kitrwiang naduh u President haduh ki dkhot jong ka seng ba kin nang pyntyllun ïa ka kam ha ka district hi baroh kawei.
Ha katei ka jingïalang pynskhem nongkitkam u Bah Equator Nongrang ula shah pynskhem kum u President jong ka Youth Wing EWKHD nangta u Bah Bengol Marngar kum u General Secretary, u Bah Clement Dkhar kum u President ka youth wing Mairang Circle bad kiwei kiwei de ki nongkitkam.
