SHILLONG:
Ka ophis treikam jong ka District Election Office, East Khasi Hills ka pynlong ïa ka jingïalang bad ki lad pathai khubor ha ka 4 tarik u Kyllalyngkot, halor ka jingïadei jong ki lad pathai khubor bad ka ilekshon kaban wan. Ïa kane la pynlong hapoh ka ophis jong ka Deputy Commissioner, Shillong.
Haba kren ha kane ka sngi, ka Additional Deputy Commissioner, ka Kong D. Kharshiïing kala batai halor ki hukum bala bthah da ka Supreme Court bad ki lad pathai ki hap ban bud katkum ki kyndon ha ka rukom pynsaphriang ïa ki khubor.
“Kino kino ki jingpynbna kiba pyni da ki nongpynïaid cable ki dei ban bud katkum ki aiñ jong ka ri bad kimdei ban don ka jingktah ïa ka bha ka miat,” ka la ong.
Ka la bynrap ruh da kaba ong, “Ym dei ban pyni ïa ki jingpynbna kiba don ka jingkynthoh pyrshah jaitbynriew bad kiba long pyrshah ïa ki aiñ jong ka ri India.”
Ka la kyntu ruh ïa baroh ki lad pathai khubor ban peit bha bad ban pynshisha ïa ki jingpynbna kiba ki ïoh ha shuwa ban pyni paidbah. Ki kyrtong jong ki seng saiñ pyrthei kin hap ban pan jingbit ha shuwa ban pynmih paidbah bad hadien ba ki la ïoh jingbit kin sa lah ban phah ban pynmih ïa ki advertisement ha ki lad pathai khubor.
Katba ka Assistant Commissioner ka Saloni Verma haba kren ha kane ka sngi kala kyntu ïa ki nongtrei kiba trei ha ki lad pathai khubor bad batai halor ka jingïadei hapdeng ki lad pathai khubor bad ka politik.
Ka kyrmen ba kum ki nongthoh khubor, ki dei ban don ka jingkitkhlieh haba ïadei bad ki jait khubor kiba ïadei bad ka ilekshon.
Ka Assistant Commissioner ka la batai shuh shuh haba ïadei bad ki jingpynbna ba ki dei ban ïoh ïa ka jingmynjur khnang ba kin lah ban pynmih paidbah. Ha kaba u Returning Officer jong ka konstitwensi un hap ban ai ka jingmynjur.
