SHILLONG:
Ka UDP Mawphlang circle ka la ïakynduh jingeh bad sah khunswet mynta hadien ba u MLA u Bah Eugeneson Lyngdoh u la rai ban ym ïaleh shuh ïa ka elekshon MLA 2023 watla u pdiang ban long kum u President ka party ha ka jingïalang kaba long mynta ka sngi ha Mawngap.
“Ka jingïalang mynta ka sngi ka long ban thaw ïa ka UDP Mawphlang circle bad kawei pat ka dei ka daw shimet jong nga ban ym ïaleh shuh ïa ka elekshon 2023. Ka dei ka rai jong nga shimet na bynta ka jingthmu jong lajong”, la ong u Bah Eugeneson haba kren hadien ba la wai ka jingïalang ha Mawngap mynta ka sngi.
U la bynrap, “Watla ka shong ha ka jingsngew shimet jong ki paidbah hynrei kaei kaei ka rai kaba nga shim nga sngew ba kan long kaba bha ïa ka party”, la ong u Bah Eugeneson.
Watla u la rai ban ym ïakhun shuh ïa ka elekshon hynrei un dang dei u dkhot ka UDP ba un trei na bynta ka party. “Kumba ka long nga dei u dkhot ka UDP, na ka liang jong nga ngan pyrshang ban trei shitom na bynta ka party”, u la ong.
Kumba la ioh ïa ka Circle kan pyrshang ban buddien ïa kiba kwah ban phah ïa ka aplikeshon ban ïakhun ïa ka elekshon.
Haba kylli ïa kawei ba un shim, u Bah Euegene u la ong, “na bynta ka lawei jong nga, ngan pyrkhat ïa kaba dei ban leh”. Kane ka jingpynbna u Bah Eugeneson ban ym ïaleh shuh ïa ka elekshon, ka la pynkulmar thlim ïa ki paidbah nongkyrshan ka UDP ha Mawphlang konstitwensi bad don kiba lah ban leit kyrshan noh ïa u kyrtong ka PDF u Bah Auspicious Lyngdoh.
Katkum ka khubor, u Bah Eugeneson u la pyntip ïa ka rai jong u ban ym ïaleh shuh ïa ka elekshon sha ki nongkitkam ka seng kmie ka UDP naduh u bnai Ïaiong bad Jymmang mynta u snem.
Lah ban kdew ba u Bah Eugeneson u la jop ïa ka elekshon shiteng samoi ha u 2021 hadien ba u la ïakhun na ka jingkhlad noh u kpa jong u, u Bah SK Sun.
