MAWTHADRAISHAN:
Da ki hajar ngut ki paidbah nongkyrshan ka UDP jong ka Mawthadraishan konstitwensi ha ka 5 tarik Kyllalyngkot, kila tuid ban sakhi sha ka jingïalang paidbah ka party kaba la pyllong ha madan Kynshi.
Ha kane ka sngi, ki paidbah ba wan ban sakhi, kila rai ban kyrshan tyngeh ban pynjop biang ïa u Bah H Brolding Nongsiej uba la jop 2 sien kum u MLA.
Haba kren ha kane ka jingïalang, u Bah Brolding u la pynpaw ïa ka jingsngew skhem ba ha kane ka elekshon kaba mynta un jop da kaba suk. U la ong ruh ïa ki nongkyrshan ba kim dei ban artatien shuh namar ba ki kyrtong kiba ïaleh pyrshah ïa u ki dei na kajuh ka ïing kiba la ïa pait ïa pra.
U Bah Brolding ula ong ruh ba ka jingmih noh jong ka kong Biolinda L Nonglait na ka seng Hill State People Democratic Party (HSPDP) sha ka seng National People’s party (NPP) ka seng kaba dang thymmai hapoh kane ka konstitwensi ka la pyntlot ïa ka seng HSPDP, kaba shu leit paiñ briew nabar, u bym dei satia na ka konstitwensi. Ka HSPDP kan pynieng ïa u Bah Shakliar Warjri uba la pynkhreh bha mynta.
U pynshai ruh ba ki don shibun ki jingthok ki jinglamler na ki liang kiba ïaleh pyrshah ha kaba ïadei bad kane ka elekshon 2023 ba ka UDP ha Mawthadraishan kam don shuh ki nongsynran bad ki nongkyrshan hynrei kine baroh ki dei tang ki jingjler kiba kwah ban pynsngewthuh bakla ïa ki paidbah kiba Kyrshan ïa ka seng.
U la kyntu ruh ïa ki paidbah jong kane ka Konstitwensi kiba kyrshan ïa u ba kin trei shitom ban ïawer lang ïa kito kiwei ki paidbah ki bym ju pat jied mynno mynno ruh ïa ka seng ba kin wan kyrshan noh ïa ka UDP khnang ba kin ïoh ban pynrem kput ïa kitei ar tylli ki seng kata ka HSPDP bad ka NPP.
Ha ka jingïalang u la kular ba lada ki paidbah kin jied biang ïa u, un ïakhun ban wanrah noh ïa ka CHC, ka College, ka surok sha ki shnong bym pat ïoh surok bad ban plie lad ïa ki samla ha ka ïoh kam ïoh jam. U la ong ba ka jaka hikai ne coaching centre yn plie biang ha Kynshi khnang ban ïarap ïa ki samla ka konstitwensi ha ka ïoh kam ïoh jam bad kiwei kiwei ki lad. Katba ïa ka MLA Skhim yn ai noh shi khlieh shi khlieh, ym shuh ha ka tnum ïing.
Ha kane ka jingïalang la ïoh ruh ïa ka jingkren na u Bah Jambor War u MDC uba dei ruh u EM ka KHADC, u Bah Blanding Warjri u MDC barim, u Bah Pius Kurbah u kyrtong barim ka Congress bad kiwei.
