SHILLONG:
Ka jingïathaw sorkar lang ka UDP bad ka NPP ha kane ka kynti hadien ba la mih ka result MLA ha ka 2 tarik Lber mynta u snem, ka lah ban ktah ïa kine ki ar tylli ki parti ha ka elekshon ba marwei, kata ha Sohïong konstitwensi.
Toi, shwa ka 27 tarik Rymphang, ka sur ka sawa jam ba ka jingïakhun ka lah ban long hapdeng ka UDP bad ka NPP ha Sohïong konstitwensi hynrei la hap ban sangeh noh ïa ka elekshon ha Sohïong na ka jingkhlad kyndit u bah HDR Lyngdoh.
Ka lyer elekshon ha Sohiong mynta ka lah ban kylla kynsan hadien ba ki paidbah kila peitkhai ïa ka jingïaleh jong ka UDP bad ka NPP bad kiwei ki seng riewlum ban ïashong lang ha ka sorkar MDA-2 hadien ba kila ïather ha madan ban kynthoh kawei ïa kawei pat ha ka por elekshon. Katkum ka jingkynthoh ha ki social media, ki paidbah kila kynthah jur ïa kine ki ar tylli ki seng kiba don lang ha ka sorkar bad kila kyntu ïa ki nongthep vote ka Sohïong ban phai khmat noh sha ka Congress, kaba shong ha ka liangpyrshah ha kane ka kynti.
Ki nongkynthoh ha Social Media kila sin ki oh ba ka UDP bad ka NPP ki dei kiba shu leh mynleh tang shwa ka elekshon katba hadien ba la dep ka elekshon, ki la kdup lang biang ban thaw sorkar.
Katba ka UDP ka kyrmen ba ka jingsngewlem jong ki paidbah ïa u bah HDR Lyngdoh kan long ka daw ban pynjop don burom ïa u kyrtong jongka, u bah Synshar Thabah uba dei u pyrsa jong u bah HDR Lyngdoh, ka NPP pat ka la pynksan nia ba kan bha ban jied beit ïa u kyrtong ka NPP u bah Samlin Malngiang, namar ba ka la ïalam lypa ïa ka sorkar khlem da donkam ban ap nabar ïing.
Hynrei na ka liang u kyrtong ka Congress u bah Osborne Kharjana u la ther kylla ïa kine ki seng riewlum bad ïa ka NPP ba ki dei tang ki dur bula jong ka BJP. Ka Elekshon ha Sohiong kan long ka jingtynjuh ïa ka UDP kaba leit ïasoh ha ka sorkar ba ïalam ka NPP, katba kan dei ruh ka jingtynjuh ïa ka NPP haduh katno ki paidbah kin jied namar ba ka don ha ka sorkar.
