SHILLONG:
Ki nongïalam ka United Democratic Party (UDP) ki la pynpaw ïa ka jingshaniah bad ka jingsngewskhem ka bakhraw ba kin ym shah knieh ka shuki minister lada ki MLA ka People’s Democratic Front (PDF) kin leit ban pynïasoh sha ka National People’s Party (NPP) ka ba long ka party kaba bun tam ki MLA.
Lah ban kdew hangne, hadien ba la mih ka khubor ba ki ar ngut ki MLA ka PDF kiba kynthup ïa u Bah Banteidor Lyngdoh bad u Bah Gavin Mylliem ki lah ban pynïasoh noh sha ka party NPP, shwa ka ilekshon Sohiong, bad saphriang ruh ka khubor ba kane ka jingpynïasoh jong ki, ka lah ban pynduh shuki minister ïa ka UDP.
U General Secreatary ka UDP, u Bah Jemino Mawthoh, u la pynpaw, “Ka UDP ka shaniah bad ka sngewskhem ïa ka jingïalam jong u Conrad K Sangma, u ba long u myntri rangbah ka jylla ba un ym knieh ïa ka shuki myntri wat la ka don ka jingkiew ha ka jingdon ki MLA ha ka NPP”.
“Kumba, ha ka Sorkar Meghalaya Democratic Alliance (MDA-I) ngi la ïatreilang kumta hi mynta ruh kan don ka jingïatreilang bad ngi sngewskhem ba ngin ym duh ïa ka shuki minister bad ka dei tang ka jingpyrkhat na ki liang ki ladpathai khubor hynrei kan ym long kumta”, u la ong.
U Bah Jemino Mawthoh, u la wan ban ïakynduh ïa u President ka UDP u Bah Metbah Lyngdoh ban ïasyllok halor ka jingpyntreikam ïa ka Roster System.
U Bah Jemino u la ong ba katkum ka jingsngew jong nga, ka long ba lada ïa kane ka mat yn rah hapoh ïingdorbar thawaiñ ruh ka dei ban long ban ïatai ha kata ka rukom ban ïoh ïa ka jingmyntoi ïa ki samla na ki ar jaitbynriew.
U Bah Jemino Mawthoh, u la ong ba ka dei ban don ka jingpynbeit biang ïa ka Reservation Policy, namar ïa ka ne ka policy ym shem la pynbeit mynta la 50 snem.
Halor ka Roster System, u Bah Jemino, u la kdew ba ka donkam ban pyntreikam ïa ka, ha ka rukom ka ban ïa biang lang khem da ñiewbeiñ ïa kano kano ka jaitbynriew, ki ba kynthup ïa ka Khasi–Jaiñtia bad Garo.
