SHILLONG:
U Bah Titos W Chyne, MDC ka Sohra bad Chief Executive Member ka Khasi Hills Autonomous District Council (KHADC) u la ong watla u shah rem ha ka elekshon MLA ba dang shu dep hynrei u kitbok kitrwiang pat ba ka jingangnud ki paidbah ka Sohra kan urlong.
U la bynrap da kaba ong ba wat la ka jingïaleh kalong kaba ïakhait bha, hynrei u la shah rem noh, u la ong ba na ka liang ka jong u, ym don kano kano ka jingsngew hynrei u sngew synei ïa ki paidbah kiba thrang ban don ka jingkylla hynrei ym tip na kaei ka daw ba kim shym la lah ban poi sha ka thong.
“Wat la nga rem ruh, hynrei kumba nga ju trei , nga ju ïaid ju ïeng ngan trei na ka bynta u paidbah,” u la ong.
Na ka liang u bah Titos u la bynrap ruh da kaba ong, “Ka jingpykhie im biang ïa ka karkhana pynmih dewbilat ka Mawmluh Cherra Cement Limited (MCCL) bad ba jingangnud ban kyntiew kyrdan District ïa ka Sohra Civil Sub-Division kin urlong noh ha ka jingïalam ka Sorkar MDA-II.”
“Nga kyrmen ba kine ki jingthrang u paidbah kan urlong, lyngba ka jingtrei shitom jong u MLA u ba dang sha jied,Ngi kwah b aka MCCL kan trei kam noh, kan ïeng biang, kan pynmih cement biang, ba kan long ka jingmyntoi ym tang na ka bynta ka mynta, hynrei na ka bynta ka lawei jong ki khun ki kti ki jong ngi, kiba don kam ïa ka ïoh kam ïoh jam. Namar bun ki samla ki jong ngi kiba la nang la stad hynrei kim don kam don jam,” u la ong.
U bah Titos u la bynrap da kaba ong ba lada ka MCCL ka ïeng, lad aka cement ka ïaid ngin dang lah ban plie ki lad ki lynti na ka bynta ki samla.
Haba ïadei bad ka District na ka liang u bah Titos u ong ba u don ka jingkyrmen ba u MLA ba mynta un buddien bad pynurlong ïa kane ka jingthrang jong u paidbah.
Halor kiwei pat ki mat kiba don kam kum, ka pule puthi bad ka koit ka khiah, na ka liang u bah Titos u la ong ban buddien bad ban dawa nga lah, hynrei ban pynlong kam pat u artatien, namar ha kane ka sorkar ki la shim ïa ka rai ba u no uno u MLA uba don hapoh ka sorkar MDA uta u dei u Myntri Rangbah jong ka Constituency, bad ym don ba lah ban ong eiei.
Kum ban shu kdew ba u Bah Titos uba la shah rem tang da 15 vote ha ka elekshon MLA ba dang shu dep, u la ong ba ka dei ka rai jong ki paidbah haba ki jied ïa ki nongmihkhmat bad kum u nongmihkhmat uba la ïai don bad ki paidbah ka Sohra Constituency la 15 snem un ïai bteng ïa ka jingshakri jong u kumba ju long baroh shi katta.
Halor kiwei pat ki mat ïakren kum ka jingbym biang ki jaka pule bad ki jaka sumar kiba u la ju rah ban kren ha ki rynsan ïalap elekshon, u la ong ïa ka jingbud dien u lah ban bud dien namar ka Party kaba u don hynrei ka shong ha u MLA uba la shah jied kata u Bah Gavin M Mylliem namar u ruh u don ha ka Sorkar.
