SHILLONG:
U nongaiktien ka All India Trinamool Congress (AITC) u Saket Gokhale ula ther ia u myntri ka tnad kam pohïing ka ri u Amit Shah halor ka jingsngap jar ia ka jingjia ha Mukroh, West Jaintia Hills ha kaba 5 ngut ki mynsiem ba lui lui kila shah siat iap ha ki pulit ka Assam.
Ha ka twitter, u Gokhale u la ong, “Tang shi kyntien ruh u Amit Shah um don por ban kren halor ka jingshah siat iap 5 ngut ki riewlum ha Mukroh namar ba u bunkam ban ialap elekshon ha Gujarat”,.
U la buh kylli ia ki BJP ba hato ki mynsiem jong ki paidbah ha North East ki dei kiba tad dor. “Hato ki mynsiem jong ki briew ha North East ki dei kiba tad dor?”, la buh jingkylli u Gokhale.
Lah ban kdew bas an ngut ki nongshong shnng na Mukroh bad uwei u nongap Khlaw ka Assam kila iap ha ka jingsiat ki pulit ka Assam ha ka 22 tarik Naiwieng 2022 ha Mukroh hadien ba la don ka jingiapyni bor.
Ka sorkar Meghalaya ka la pynbna ban iarap mar 5 lak tyngka sha kiba haïing kiba shah siat iap. Ka TMC ruh ka la pynbna ban ai jingiarap 5 lak tyngka.
Namar ka jingjia ha Mukroh, ka la pyllong ia ki sengbhalang, ki paidbah ban pynrem jur ia ka jingleh ki pulit ka Assam bad ka la don ruh ka jingiakhih ha ka nongbah Shillong bad kiwei ki jaka ban pynrem bad sngewlem ia ki lanot.
Ki kynhun sengbhalang bapher bapher kila pyllong ia ka jingiakhih da kaba thang mombati, thang tynsong ia u Myntri Rangbah ka Meghalaya, u Conrad K Sangma, u Myntri Rangbah ka Assam u Himanta Biswa Sarma bad kiwei.
Ka sorkar Meghalaya hapoh ka jingialam u Conrad kila iakynduh ia u Amit Shah ha ka 24 tarik Naiwieng ban dawa ban thung ia ka jingtohkit da ka CBI halor ka jingjia ha Mukroh ha kaba u myntri ka tnad kam pohïing u la mynjur ban thung da ka jingtohkit jong ka CBI halor katei ka jingjia.
