SHILLONG:
U President ka United Democratic Party (UDP) u Bah Metbah Lyngdoh, myn ha ka 19 traik Nohprah 2023, u la ong ba ka party ka la aiti ha u nongïalam ki MDC ban bishar halor ki MDC ka UDP kiba la leit ban kyrshan ïa ka Liang shynshar ha KHADC khlem da pyntip sha ka party.
Lah ban kdew hangne ba ki ar ngut ki MDC ka United Democratic Party (UDP) ki ba kynthup ïa u Bah Bindo M Lanong u MDC ba shu thung bad u MDC ka Nongkrem Constituency bad u Bah Lambor Malniang ki la rai ban leit kyrshan noh ïa ka Executive Commitee jong ka Khasi Hills Democratic Front (KHDF) ba la ïalam da u Bah Pyniaid Sing Syiem ha KHADC
Halor kane, na ka liang u President ka UDP u Bah Metbah Lyngdoh u la ong ba na ka liang jong u ym shem la ïoh kano kano ka jingtip hynrei u la shu ïohi lyngba ki lad pathai khubor kumta ka party ka la rai ban aiti ïa kane ka kam ha u nongïalam ki MDC u Bah Titos W Chyne ban bishar ïa kane ka kam .
Halor ka jingkynnoh u Bah Bindo M Lanong u President u la ong, “ngam kwah ban kren eiei ha kaba ïadei bad kane ka jingkynthoh hynrei kum ka party hi ka burom ïa u Bah Bindo kum u nongïalam ba la rangbah ha ka party”. U la kyntait ruh ba ka party UDP ka la ïehnoh marwei ïa u Bah Bindo M Lanong bad ong ba na ka por sha ka por ki ju don ka jingïakren halor kiba bun ki mat jong ka party.
Na ka liang u Bah Titos W Chyne u nongïalam ki liang pyrshah ha KHADC u la ong ba kane ka jingleit ai jingkyrshan jong ki ar ngut ki MDC ka UDP ïa ka kynhun ba la ïalam da u Bah Pyniaid Sing Syiem kam dei kaba phylla namar ka la don lypa la slem.
“Kane ka jingleit ai jingkyrshan jong ki, kam dei ka ba phylla namar ba tang shi kynta ba la shah pynkhyllem ka EC ba ïalam ma nga ruh ki la leit ban kyrshan ïa ka EC u Bah Pyniaid, te ka la don lypa ka jingkyrshan kaba la slem na ka liang jong ki,” u la ong.
