NONGPOH:
Shi bynta ban ai ïa ka jingkyrshan kaba pura ïa u Bah George B. Lyngdoh, kyrtong ka TMC na Umroi konstitwensi, ka Party TMC ha ka 25 tarik Rymphang , ka la pynlong ïa ka jingïalang paidbah ha Madan Umroi bad ha katei ka sngi, la iohi da ki hajar ngut ki paidbah, ki la tuid sha katei ka jaka bad kaba la pynlong ia ka madan Umroi ba kan dap hi snam da ki nongkyrshan ka TMC.
Ha katei ka sngi, ba ka TMC ka la pynlong ïa katei ka jingïalang paidbah, la wan ban pynshngain ruh da ki heh nongïalam ka TMC, kiba kynthup ïa u Dorek O’Brien, MP ka TMC ha Rajya Sabha, nangta u Dr. Fabian Lyngdoh, General Secretary ka TMC ha ka jylla, u Ma MB Rymbai, CEM barim ka JHADC lem bad kiwei.
Lyngba jong katei ka jingïalang, ki la don shibun ki nongkren bad kiba la kyntu ïa ki paidbah, ba ha kane ka kynta kaba mynta ba kim dei ban shah thied ne shah pynbiej ha ka pisa pliah jong ki briew kiba thmu ban thied wat ïa ka hok jong ki briew kiba thmu ban leit thep vote.
Na ki nongkren ha katei ka sngi, ki la pynpaw ruh ba ha ka Ilekshon 2018, ki paidbah ka Umroi, ki la ïoh ïa kata ka nam ba ki dei kiba stad ban jied nongmihkhmat, ha kaba ki la pynjop don burom ia u Bah George B. Lyngdoh, uba la lah ban pynliem ïa u Ma Ngaitlang Dhar, uba dei uwei na ki heh spah hapoh ka jylla hi baroh kawei.
Ki la pynpaw ruh, ba ha kane ka kynti kaba mynta ruh, ki paidbah kim dei ban bakla bad lada ki bakla kin sa ngat ha kata ka thup kum ki briew ki bym nang ban jied ia ki nongmihkhmat.
Ki la pynmih ruh ïa ki kyntien, ba kumba ka long mynta, ka jingïaknieh ïa ka nam bym nangjied nongmihkhmat, ka dei hapdeng ka Umroi bad Nongkrem, ha kaba lada kitei ki Konstitwensi kim nangjied ïa ki nongmihkhmat, kaba mut ba kin sa ïoh ïa kata ka nam kum ki briew, kiba lah ban shu thied tang ha ka pisa.
Kumba u Bah George Lyngdoh, u la dei uwei na ki briew ba la paw eh hapoh ka jylla, halor ka jingtbit jong u ban long kum uta u nongmihkhmat bad uba ïasaid ha Ïing Dorbar Thawaiñ, kumta ka jingkyrpad na kitei ki nongkren, ka long ba ki kyntu ïa ki paidbah ba ha kane ka kynti kaba mynta ruh, ki dei ban pyni ïa kata ka jingbtit jong ki ban jied ïa ki nongmihkhmat, ki la bynrap.
