SHILLONG:
Tang hadien shi sngi ba ki ar ngut ki MLA ka HSPDP, kata u Bah Methodius Dkhar na Mawshynrut bad u Bah Shakliar Warjri na Mawthadraishan ki la leit ban ai ka jingkyrshan ïa ka seng NPP ban thaw sorkar ha ka jylla, ki seng bhalang ha ka 4 tarik Lber kum shibynta ban pynpaw ïa ka jingpyrshah halor ka rai jong ki ar ngut ki MLA ki la pynlong da ka jingthang tyngshop ha Motphran.
Ïa kane ka jingïalang la wan ban ai jingkyrshan lang da ki dkhot ka HITO, ka HNYM, ka AIM , ka Sur u paidbah ka Hynñiewtrep, kiwei kiwei bad ha ryngkat ka jingkyrshan lang ki phewspah ngut ki paidbah, ki ba la pyrta jam da ka wei ka sur sha ki ar ngut ki MLA ki ba kynthup ai u Bah Shakliar Warjri u MLA ka Mawthadraishan bad u Bah Methodius Dkhar u MLA ka Mawsynrut konstitwensi.
Ki nongïalam jong baroh ki sengbhalang ki la kyntu ïa kine ar ngut ki MLA ba ki dei ban weng noh mardor ïa ka jingkyrshan jong ki ïa ka NPP bad ki dei ban wanphai bad ai jingshai sha ka party UDP.
U Bah Donboklang Kharlyngdoh, u la ong “ ïa ka jylla la ai ban ïalam da ki paralok Garo mynta da ki phew snem hynrei mynta ka kynti da ka wei ka sur ngi kwah ba u Khasi un ïalam noh ïa ka jylla kumta ka donkam ïa ki ba kin weng ïa ka jingkyrshan NPP bad wan sha ka UDP”.
U la bynrap, “Ka Sur u paidbah ka Bri u Hynñiewtrep mynta ka dang ap khmih lynti ïa ka jingwan phai jong kine ki ar ngut ki MLA, ngin ym ong nongshet kylla mynta namar ïoh ki wan noh shwa ka 7 tarik”.
“Ki paidbah kiba la jied ïa u nongïasait ban im ka ri bad ka jait bynriew, hynrei kine ki khun sarong awria ki la pyndonkam ïa ka kyrteng u Maieid Hopingstone bad ki mut pat ban die tad ïa ka jaitbynriew jong ngi”, la ong u Bah Kharlyngdoh .
U la bynrap “Sngewbha peit ïa ka jaitbynriew bad wat kwah ba ka ding kan klang, shuh shuh lai tylli ki sngi phi don ban wan phai noh sha la u kpa, u Bah KP Pangniang” .
U Bah Kharlyngdoh u la ong shuh shuh “Lada kim kylla bamut ha shwa ka 7 tarik, ka sngi ba dei ban bamsmai ka sorkar thymmai, ngin leit hapoh ka ïing u Lat ka jylla ban shong tawiar bad ngin phah hiar ïa ki namar u paidbah u ba jied ïa ki ym ma ki, ki ba jied ïa u paidbah”.
