NONGSTOIÑ:
U MLA ka Nongstoiñ ba dei ruh u kyrtong ka National People’s Party (NPP), u Bah Macmillan Byrsat, lem bad u MDC ka Nongstoiñ ba dei ruh u kyrtong ka Indian National Congress (INC), u Bah Gabriel Wahlang, ha ka 3 tarik Rymphang ki la leit ban pyndep ïa ka jingthep kyrteng ka jong ki hakhmat u Returning Officer ka WKHD na ka bynta ban ïakhun ïa ka elekshon sha ka ïing dorbar thaw aiñ ka Jylla na Nongstoiñ konstitwensi.
La synran lang ïa u Bah Byrsat da kiba ha ïing ha sem lem bad ki nongkyrshan ka NPP kiba la ïashim bynta ruh ha ka rally ban ïaid naduh ka ïingsah jong u na Pyndengrei ter ter shaduh ka ophis u Deputy Commissioner ka WKHD.
Haba kren sha ki lad pathai khubor hadien ba la dep thep kyrteng, u Bah Byrsat u la ong ba u dang angnud ban pyndep ïa ki kam kiba dang sahteng bad u la ong ruh ba u kwah ban ïohi ba ka Nongstoiñ konstitwensi kan ïa ryngkat dor bad kiwei ki konstitwensi ha ka Jylla lane kham palat bad ban pynïoh ïa ka Nongstoiñ kum kata ka smart town.
U Bah Byrsat u la pynpaw ruh ïa ka jingsngewskhem ban ïoh biang ïa ka jingjop ha kane ka kynti da kaba u la ong ba wat ha u snem 2018 ha kapor ba lyngkot um shym la lah ban poi ha man la ki shnong jong ka konstitwensi hynrei u la jop bad mynta kum u MLA la 5 snem ki paidbah ki la ïohi ïa ki jingtreikam jong u kum u MLA bad jong ka sorkar NPP.
Katba na ka liang jong u Bah Gabriel Wahlang haba ïakren sha ki lad pathai khubor u la ong ba hadien ba ki paidbah ka Nongstoiñ konstitwensi ki la jied ïa u kum u MDC, u dang kwah ban shakri khambha ïa ki paidbah kum u MLA bad u la ong ruh ba ka shong ha ka mon kaba laitluid jong ki paidbah ïano ba kin jied kum u ta u nongmihkhmat.
Shuh shuh u la ong ruh ba ka jingïakhun hi kan long ïa baroh ki kyrtong namar baroh hi ki long kiba bit kiba biang bad u la ong ruh ba lada u jop ka thong kaba ha khmat eh ka long ban peit ïa ka kamai kajih u paidbah, ka pule puthi bad ka ïoh kam ïoh jam ki samla.
Kiwei kiwei ki kyrtong kiba la pyndep ïa ka jingthep kyrteng ha kane ka sngi ki kynthup ïa u kyrtong ka NPP u Bah Kimfa S Marbaning, u kyrtong shimet u R.G Momin bad u kyrtong ka INC u Bah Goldenstar Nonglong, kiba dei na ka Rambrai Jyrngam konstitwensi.
