SOHÏONG:
U kyrtong ka Hill State People’s Democratic Party (HSPDP), u Bah Sandondor Ryntathiang, ha ka 10 tarik Jymmang u la thep ïa ka vote jong u na ka bynta ka elekshon shiteng samoi jong ka Sohïong assembly konstitwensi.
Ha kane ka sngi la ïohi ba bun ki briew ki la leit sha ki polling stations naduh dang step ban thep vote, bad u Bah Sandondor u la pynpaw ka jingkyrmen ba ka jingwan ki nongthep vote kan kham bun ha ki kynta ba bud. Ka jingwan ki nongthep vote haduh ka por 1 baje nohphai sngi ka long 67.76 per cent.
Haba kren halor ka jingïakhun elekshon jong u, u Bah Sandondor u la ong, “Ka jingïalap elekshon jong ka ka ïeng ha ka nongrim jong ka HSPDP. Haba nga leit ïalap elekshon, ngam don por ban ïa kynnoh ïa kiwei ki kyrtong lane ban kyntiew ïa ka jingïashun, hynrei nga ong ïa ki briew jong nga kumno ba ngi lah ban wanrah ïa ka roi ka par ha ka konstitwensi kum ha ka liang ka pule ka puthi, ka rep ka riang bad ki jingshna ki jingtei.”
U la ong ba lada un shah jied ha ka 13 tarik Jymmang, un trei ban wanrah ïa ka roi ka par ha ka konstitwensi ha kiba bun ki liang.
Haba kylli haei ka HSPDP ka ïeng, u Bah Sandondor u la ong, “Kumba phi ïohi, kiwei ki kyrtong kiba ïakhun ïa ka shuki ki ïakynnoh pyrshah iwei ïa iwei. Hynrei ki briew jong ka Sohïong ki tip ïano ban phah sha Assembly bad ki kwah ïa ka jingkylla, bad kata ka lah ban long tang lada ki jied ïa nga, u kyrtong ka HSPDP.”
Haba kylli la ka pisa ka treikam jur ha Sohïong, u kyrtong ka HSPDP u la ong hooid. “Nga la don ha ka seng naduh ka snem 2013-14 bad nga la don ha ka jingshah btin lynti u president ka seng ha kato ka por u Bah Ardent Miller Basaiawmoit, uba la hikai ïa nga shibun kiei kiei kaba kynthup ruh ïa ka saiñ pyrthei kaba khuid,” u la ong.
“Haduh kane ka khyllipmat, nga pat ju la hikai ïa ki briew jong nga ban pyndonkam ïa kata ka pisa. Nga ïakhun man la ka sngi pyrshah ïa ka jingpyndonkam ïa ka bor pisa,” la ong u kyrtong ka HSPDP.
Shuh shuh, u la ong ba ka jingbyrngem bad ka bor pisa ki treikam jur ha Sohïong, bad u la bynrap, “Kumba phi ïohi, ki heh sorkar – u Myntri Rangbah ka jylla, ki Myntri ka sorkar jylla ki la leit rung ha baroh ki kyndong kynshrot ka konstitwensi jong ngi, hynrei ki briew kim kwah ïa kata. Ki kwah ïa u briew uba smai ban pynkylla ïa ka saiñ pyrthei kabym khuid sha ka saiñ pyrthei kaba khuid.”
