SHILLONG:
U MLA ka TMC u bah George B. Lyngdoh u la kynnoh ba ka Bharatiya Janata Party (BJP) ka don ka jingthmu ban pynlong kawei ka niam ha baroh ki jylla, kaba dei ka jingma ïa ka jylla khamtam ïa ki riew ngeit Khristan.
Ïa kane u bah George u la kren ha ka jingïalang ka TMC ha ka shnong Mawngap, ha ka jingïadon ryngkat da ki spah ngut ki nongkyrshan ka party.
Haba kren halor ka jingshah ñiewbein ki paid Khristan ha ka BJP, u bah George u la kynnoh ba kum kane ka jingjia kan ym slem shuh ba ka sorkar ba la pynïaid da ka BJP kan sa leh kumjuh ïa ki nongshong shnong ha ka jylla Meghalaya.
U la kdew ruh ba ka BJP ka la sdang ban pyntreikam ïa la ki policy jongka, kiba la peitngor bha katno tylli ki ïingmane bad ki nongïalam niam ki don bad katno tylli ki longïing ki dei na ka niam Khristan ha kine ki 6 snem.
Ka BJP ka don ïa ka jingthmu ban pynlong kawei ka niam ha baroh ki jylla, ki ïingmane barobor ki ju shah pynpra, hynrei ka TMC kan ym lah ban shu ïeng bad peitkai hynrei kan ïai kren halor kane ka jingwan ïuh kjat ka BJP ka ban sa pynduh pyndam ïa ka nam jong ka jylla.
U bah George u la ong, “ka TMC ka wan ha ka jylla na ka bynta ki longïing bad ki khun jong phi, ngi la sdang ïa kane, da kaba ka TMC ka la kular ba kan ai ka jingïarap pisa ïa ki longkmie jong kawei pa kawei ka ïing ha u 2023 bad ka la pynlait paidbah ruh ïa ka Women Empowerment Card (WE Card) hapoh ka MFIWE Scheme”.
Ha kane ka jingïalang la pynlong ha ka jingïadon ryngkat lang u Vice President, u bah James Lyngdoh, ka kong Kathelene Marbaniang, Kong Elgiva Rynjah, bad u Mawphlang Block Convenor Mawkordor Rynjah bad kiwei..
