SHILLONG:
U Member ka Parliament (MP) Rajya Sabha na ka jylla u Dr WR Kharlukhi u la ong ba u thrang ba ka sorkar Meghalaya Democratic Alliance (MDA) 2.0 kan kyntiew ïa ka seng kam seng jam bad ka kam jngohkai ha kine ki san snem ki ban wan.
“Ngi hap ban peit haba ïadei bad ka ïoh kam ïoh jam namar Shibun ki lad ki don ha ka jylla jong ngi,” ong u Dr Kharlukhi.
Haba kylli halor ka jingkynnoh bamsap ïa ka sorkar barim, bad kaei ka jingkwah ban ïohi ha kane ka sorkar ba mynta, u Dr Kharlukhi u la ong, ha ki por ba la dep u la dep ban ong da kaba shai ba ka jingkynnoh bamsap ka dei tang ka mat politik. U buh jingkylli ruh ïa ki paralok kiba don hapoh ka sorkar MDA kiba pyrshang ban leh politik halor kane ka mat.
U la bynrap da kaba ong ba ma u ruh u pyrshah ïa ka bamsap, hynrei lada ki don ki jingpynshisha halor ka bamsap jong ka sorkar, ki dei ban wanrah sha khmat bad ïa u briew uba don kti ki dei ban pynshitom da kaba tyngeh.
“Nga thrang ba ki briew kiba rah ïa kine ki mat ki don ka kabu ban long ki nongmihkhmat, ki lah ban wan rah ïa ki jingpynshisha namar ka RTI ruh ka don,” la ong u Dr Kharlukhi.
U la ong ruh ba ki nongmihkhmat kiba don bynta ha kane ka sorkar MDA 2.0 khamtam ki Myntri sorkar ki dei kiba la biang bha bad u don jingkyrmen ba kin leh bha.
Haba kylli halor ka jingkynnoh jong u Nongïalam ka Trinamool Congress (TMC) u Dr Mukul Sangma uba kynnoh ba ka jingbym lah ban thaw sorkar ka dei na ka daw jong ka jingïadie ïathied u Dr Kharlukhi u la ong ba u isynei ïa u Dr Mukul.
“U la ong bun bha, hynrei lada ki lap Pisa, ka Election Commission ka don, balei phim thoh sha ka”, ong u Dr Kharlukhi.
U MP ka Rajya Sabha u la ong u Nongïalam ka TMC u dei ban pdiang ba ki paidbah ki kyntait bad ki la thep pyrshah ïa ki ha ka jylla.
Haba ïa dei bad ka jingwanrah ka sorkar ban pyndam noh ïa ka Meghalaya Regulation of Gaming Act, 2021, ha ka jingshong dorbar ka ban wan, u la ong ka sorkar kaba lam khmat da ka NPP ka ïaid katkum ka jingdawa ki paidbah.
U la pynkynmaw ruh ba ka sorkar MDA ka la wanrah ïa ka resolution haba ïa dei bad ka ILP ha kaba ki la kyntu ïa ka sorkar pdeng ban pyntrei kam noh ïa ka ha Meghalaya.
“Ngi leit katkum ka jingthrang jong u paidbah namar ngi dei ka sorkar na ka bynta u paidbah,” ong u Dr Kharlukhi.
