SHILLONG:
U President ka KHNAM State Youth Wing u Bah Thomas Passah u la ong ba ka jingsngap jar jong u Myntri Rangbah u Conrad K. Sangma kumjuh ki seng saiñ pyrthei kiba ïadon lang ha kane ka Sorkar Meghalaya Democratic Alliance (MDA) halor ka jingdawa ka seng ban weng noh ïa ka personal interview ha ka jingthung kam ha ki Group B, C bad D, ka pynpaw ba kine baroh kim don ka jingkitkhlieh halor ka jingkyrduh kam ki samla bad ki dei kine hi ki MLA bad ki party kiba pyndonkam ïa ka jingthung kam tuh tang ban myntoi saiñ hima sima.
Ha ka kyrwoh ba la phah ba ka seng ka la dep ban ai da ka jingthoh sha ka Sorkar ba ha ka jylla Meghalaya ruh dei ban pynduh noh ïa ka jingkhot Personal Interview kumba la leh ha baroh kiwei pat ki jylla ha ka Ri India.
Ka KHNAM ka pynpaw ka jingbynñiaw bad sngewsih ba ka sorkar kam patiaw bad wat ki MLA bad ki seng sain hima ha ka jylla ruh ki long kiba kyllut bad kiba matlah.
Namar ka jingleh kuman jong ka Sorkar MDA na ka liang ka KHNAM kam banse ban shim da kiwei pat ki sienjam ban pynthikna ïa ka jingkhuid jingsuba ha ka thungkam thung jam.
