MAWKYRWAT:
U General Secretary ka Bharatiya Janata Party (BJP) ka Ranikor konstitwensi u Bah Manstudy Nongrem, ha ka 9 tarik Rymphang u la pynshai paidbah ïa ka jingleit pynïasoh sha ka BJP lem bad u MLA barim u Martin M Danggo dang shen.
Haba kren sha ki lad pathai khubor, u Bah Manstudy u la ïathuh ba ka jingmih jong u Martin M. Danggo ryngkat ka kynhun na ka National People’s Party (NPP) Ranikor konstitwensi ki don la ki jong ki daw bad ïa kita ki daw ruh ym da kwah than ban pynpaw namar ki don bun bad dei na kata ka daw ba ki nongkyrshan hapoh ka jingïalam jong u Danggo ki la shim ïa ka rai ban mih noh na ka NPP bad leit pynïasoh pat sha ka BJP. Kum u nongïalam jong ka BJP u kwah ban pynshai sha ki paidbah ba u Danggo u la shim ïa ka rai ban mih namar ka don ka jingbym suk hapoh ka NPP bad ki la leit noh sha ka BJP.
Halor ka jingkynnoh ba u Danggo u ju rung u ju mih na kawei ka seng sha kawei pat, u la ong ba ka long kumta hi namar lada ym don ka jingïasngewthuh jingmut.
“Balei ngi sngew pher bad ‘tieng, haba wat hapoh ka sorkar MDA ruh ka BJP, ka UDP, ka HSPDP, ka PDF, ki kyrtong shimet, ki don bynta lang ban thaw ïa ka sorkar hapoh ka jingïalam jong ka NPP lait noh tang ka INC ne Congress” u la pynshai.
U Bah Manstudy u la ong ba ki paidbah ki dei ban shai bad kim dei ban sngewthuh bakla halor kane ka bynta. U la ong ba haba ki jied nongmihkhmat ki dei ban jied ïa u briew ym ïa ka party namar ka party ka dei tang ka kyrteng ne ka uniform.
U la ong ruh ba Ïa ka rai ban leit pynïasoh bad ka BJP ym shym la shim rai tang ki nongïalam hynrei da ka jingïamynjurlang jong u paidbah. U la buh ka jingkyrpad ba ki paidbah kin nym don shuh kano kano ka jingartatien, jingtieng haba u Danggo ryngkat ki nongbud ki leit ban pynïasoh sha ka BJP namar kumba ka long ba ki paidbah jong ka Meghalaya ne hapoh ka North East ki don ka jingtieng ïa kane ka seng BJP hynrei “kane ka jingtieng ka dei tang ka jingbym pat sngewthuh ïa ki rukom treikam, ha kaba ka long kumjuh ha ki por ba mynshwa ba dang wan ka Congress”.
Ha kajuh ka por, u Bah Manstudy u kyrpad ïa ki paidbah jong ka Ranikor konstitwensi ba kin ai ïa kata ka jingkyrshan kaba pura na ka bynta u Danggo ba un jop ha kane ka MLA Elekshon 2023 khnang ba un lah ban pyndep bad wanrah ïa ka roi ka par hapoh ka Ranikor konstitwensi bad kumjuh ruh ban pyndep ïa ki kam kiba dang sah kum ka jingpynbit pynbiang na ka bynta ka Ranikor Civil Sub Division.
