MAWKYRWAT:
Ka Meghalaya Pradesh Trinamool Congress jong ka Mawkyrwat Block ha ka 19 tarik Nohprah ka la pynlong ïa ka jingïalang paidbah ha shnong Shngimawlein, South West Khasi Hills District ha kaba da ki hajar ki paidbah kila wan ban sngap ïa ki jingkren na ki riew rangbah ka party.
Hapoh ka jingïalam u Bah Sounder S.Cajee ki la pdiang burom ïa kiwei kiba wan na kiwei kum na ka UDP, HSPDP bad kiwei sha ka TMC.
U Sounder uba dei u kyrtong ka TMC Mawkyrwat konstitwensi u la ong ba ha kane ka kynti ba mynta ki paidbah ki dei ban husiar ba kim dei ban shah pynbiej ha ka pisa pliah kaba shi hajar tyngka ha ka 5 snem kaba pynshongdor ïa ki paidbah kaba kham heh ka dor jong kawei ka syiar ban ïa ka khlieh briew. U la ong ba kum ka party ka wan mynta hangne ban tyrwa ba ki dei ban ailad ïa kane ka TMC ha kane ka MLA Election 2023.
“U Bah Sounder uba dei u pyrsa kurim jong u Bah Rowell Lyngdoh (bam kwai ha dwar U Blei), um dei u nongkhaïi, um dei u nonghikai skul, um dei u ophisar sorkar uba la shongthait ne ba dang trei, hynrei u dei uta u nongïalam uba la mat ïa shibun ki jingeh, u dei ruh u nongïalam jong ka seng samla pule ha ki snem 1987, uba la seng ruh ïa ka FKJGP ha u snem 1990 bad uba la pynlong ka jingïalang ban ïakhih bad ïada ïa ka jaidbynriew hapoh Motphran ha kita ki snem. Nga la long uwei uba la shah pynshitom bad uba la shah set along na ka bynta ban ïada bad ban ïaleh ïa ka hok jong ki paidbah hapoh jong ka bri u Hynñiewtrep Hynñiew skum”, u la ong.
U la tyrwa ruh sha ki paidbah ba kin ai lem ka kti ka mon ka kti ka diang ban pynjop bad kyrshan ha kane ka MLA Election 2023 ym da kaba tyrwa ban pynïoh ei ei na ka bynta ki paidbah hynrei jied ïa u ban long ka jingshngaiñ ïa ka ri bad ka jaidbynriew bad u jingshngaiñ na ka bynta u duk u suk.
Ha kane ka sngi la ïoh jing kren na u Bah Dibarlang Lyngdoh, Adviser jong ka TMC Mawkyrwat Block, u Dr. Fabian Lyngdoh ba kila pynshai shuh shuh ïaki paidbah halor ka nongrim jong kane ka TMC kaba dei kawei ka party kaba ïaleh ban ïeng na ka bynta ki paidbah kaba lah ruh ban wanrah ka jing kylla hakane ka jylla bad ka ri hi baroh kawei.
Ha kane ka sngi da ki hajar ngut ki paidbah kila wan ban sakhi lang ha kane ka sngi bad la pynshit pynshngain shuh shuh da ki jingrwai bad ki jingshad na ki samla ka thaiñ Shngimawlein.
