Shillong:
U nongïalam ka All India Trinamool Congress, u Dr Mukul Sangma u la kyntait mardor ïa ka jingkam jong u MLA ka BJP u Bah AL Hek ba ki la ïakren haba dih sha ban pynïasoh noh bad ka BJP.
U Dr Mukul Sangma haba kren bad ki nongthoh khubor ha ophis treikam jong ka seng ha Nongbah Shillong u la ong, “Nga la ïohi ïa kine ki khubor tang ha ki lad pathai khubor, bad haduh mynta ruh ki dang don kiba thoh halor kane.”
U la bynrap da kaba ong, “Ngam lah ban khang ïa phi ban thoh ïa kine ki khubor bad kan bha shuh shuh lada phi ïoh sngew na ka shyntur jong ki trai kata kan bha shuh shuh”.
“Kine ki khubor ki lah ban don jingïadei ruh bad ka ilekshon ha Sohïong ban ïalam bakla ïa ki paidbah,” u la ong.
U la bynrap da kaba ong ba ka TMC ruh ka kwah ba kiwei ki MLA kin wan ban pynïasoh noh bad ka seng, “Nga khot ïa ki wei ki seng saiñpyrthei ban wan pynïasoh noh bad ngi, ka jylla ka donkam ïa ka jingïatylli jong baroh ki seng saiñpyrthei. Nga la pyrshang ïa kane ha ryngkat bad ki nongïalam ka seng da kaba ïakren ruh ïa ki wei ki nongïalam jong ki wei ki seng saiñ hima hadien jong ka ilekshon,” u la ong.
“Kaei kaba paw ka long da kumwei, ki dkhot jong ki seng ki jah hadien jong ka jingïakren bad hadien kata sa ki wei ruh ki jah, ka jingïadie ïathied ka lah ban jia bad ngi ïohi ba ka sorkar kaba rim ka la ïalam biang ïa ka sorkar,” ong u Dr Mukul.
U la bynrap ruh da kaba ong ba ha kine ki sngi ki ban wan shibun kin sa paw.
Haba ïadei bad ka jingkam jong u Bah AL Hek, u Dr Mukul u la ong ba u Bah Hek u dei u paralok bad ki la ïatrei lang ha ka por ba u long kum u Myntri Rangbah.
“U kwah ban ïakynduh bad nga ha ka 3 tarik hadien ka jingpynbna ïa ka resol jong ka ilekshon. Ngi ïakynduh ha ka por mynstep ngi ïadih sha bad ai khublei iwei ïa i wei pat,” ïathuh u Dr Mukul.
U la bynrap ruh da kaba ong, “U la ïathuh ka wei ba um kmen haba ïadei bad ka jingïoh ïa ka resol, kata ka dei namar ka BJP ruh kala pynïeng shibun ban jop kham bun ki nongmihkhmat.”
“Tang ka wei u ong kata ka long ‘sngewbha leh eiei ba ka juh ka jinglong kan ym wan shuh’ ngi ong ba ngi leh ïa kata, ha ka 3 tarik ngi la ïashong bad ki wei ki seng saiñpyrthei ban pynkylla,” la ong u Dr Mukul.
Shuh shuh u Dr Mukul ula ong, “U Bah Hek u khlem ong ban wan pynïasoh noh bad ka BJP, kaba u ong ka dei sngewbha leh eiei ba kane ka juh ka sorkar kam dei ban wan phai biang.”
“Mynta ruh nga ong ba kane ka sorkar ka dei ban leit, hynrei phi la ïohi ïa ka jingpyrshang jong ki briew kiba don ha ka bor, ki thrang ban dang don ha ka bor, phi la ïohi ïa ka jingpynïasoh jong ka wei ka seng saiñpyrthei bad ka NPP,” ong u Dr Mukul.
