SHILLONG:
U kyrtong ka Bharatiya Janata Party (BJP) na South Shillong, u Bah Sanbor Shullai, ha ka 6 tarik Rymphang u la ong ba ka BJP ka dei ka National Party bad ka jingkam u kyrtong ka Pynthorumkhrah u Bah A.L Hek ban shimti ïa ka kam Myntri Rangbah lada wan ha ka bor kam ïahap satia.
Lah ban kdew ba u Bah A.L Hek bad u Bah Sanbor Shullai hadien ki la wan ban thep kyrteng ïalade na ka bynta ka jingjied nongmihkhmat sha ka Ïing Dorbar Thawaiñ na ka bynta ka elekshon kaban sa long ha ka 27 tarik Rymphang.
Kane ka jingkren jong u Bah Sanbor ka dei hadien ba u Bah Hek u la ong ba donkam ka double engine ne ka enjin synrap sorkar ha Delhi Modi Sorkar, Meghalaya Modi sorkar bad u Bah A.L Hek un long u myntri rangbah ka jylla. U Bah Sanbor u la ong ba u Bah A.L Hek um lah ban put turoi dalade ba un long u myntri rangbah ka jylla lada ka BJP ka jop.
“Ka BJP ka dei ka National Party bad kam dei ka party jong u kyrtong ka Pynthorumkhrah u Bah A.L Hek marwei bad ka shong hapoh Delhi”, la ong u Bah Sanbor
U Bah Sanbor u la pynpaw ba hashwa ka elekshon kiwei ki seng hapoh ka jylla Meghalaya ki kynthoh laiphew jait ïa ka BJP hynrei ynda la dep ka elekshon bad ladei ka por ban thaw sorkar ki khot “Bhai Bhai” namar ki pyrkhat ka dud ka ngap napoh Delhi.
U Bah Sanbor u la ong ba u don ka jingkyrmen ban jop biang ha kane ka kynti namar ba u la trei bad u paidbah u tip bha bad ki dang don ka jingshaniah bad jingieid hapoh ka jingïalam jong u. U la ong ba ka don ka jingsngew skhem namar ba man ba u don ha Shillong lane ha konstitwensi lajong ki paidbah ki sngew kylluid ban wan ïakynduh ïa u, khamtam ban ïasyllok ïa ki jingeh jong ki, kumjuh ki Dorbar Shnong bad kiwei.
U Bah Sanbor u la kyrpad ïa ki paidbah ba lada ki jied ïa ka BJP ka don shibun ki lad ban ïarap ïa ki jingeh kiba la sahteng la bun bun snem. U la ong ba lada ki paidbah ki vote ïa ki kyrtong ka BJP kumba 31 ngut lehse yn sa lah ban weng ïa ki jingeh jingdawa jong ki sengbhalang lane ki society hapoh ka jylla bad ban pynrung hapoh ka Agenda jong ka BJP hapoh Delhi khnang ban ïoh ban ïasaid.
