SHILLONG:
U kyrtong ka United Democratic Party (UDP) na Nongpoh konstitwensi, u Mayralborn Syiem, u la ong mynta ka kynti ka Nongpoh konstitwensi kan sa pynpaw ba ka jied ïa u briew lane ïa ka seng.
Haba ïakren bad u Kynjatshai u Bah Mayborn Syiem u la ong, “U Dr DD Lapang, u dei u nongïalam jong nga, u ba la ïalam ïa nga kumba nga long mynta ruh dei na u hi bad ha kaba ïadei bad ka jingmih na ka Congress bad pynïasoh sha ka UDP ka dei ka rai jong u paidbah ym ka rai shimet”.
“Nga ha u 2018 nga la jop na ka seng Congress ngam don daw eiei bad baroh ki seng sainpyrthei ki dei ki ba bha suda bad ki mat treikam ruh ki dei hi ban kyntiew ïa ka jylla bad ka jingrai jong nga ban rung sha ka UDP ka long namar ba ka dei ka seng riewlum ka ba la rim bha” u la bynrap.
“Ha ka jingïadei bad u maheh Dr DD Lapang u ba la kyrkhuh ïa nga ha u snem 2018, mynta u snem 2023 ruh un sa ai ka jingkyrkhu ïa nga, ha ka mynsiem jong i wat la ngim don shuh ha ka juh ka seng saiñ pyrthei”, u la ong.
“Ka jingjop u Dr DD Lapang la 8 sien ka dei namar ba ki nongthep vote ha Nongpoh hi ki 70 % ki jied ïa u briew ym ïa ka party, ka elekshon ha Nongpoh hi ka dei namar ba ki jied ïa u briew ym ïa ka party “u la bynrap.
U Bah Syiem u la ong ruh “Ka jingjied ïa u Dr DD Lapang ka dei namar ba u dei u briew u ba trei u nongïalam u ba biang u ba la nongsynniang ïa ka Ri Bhoi , ka jylla hi baroh ka wei kumta u jop bad namar ba u la pynïasoh na ka Congress te ka la suhthied bha”.
“Kane ka elekshon mynta ruh ban ong ba ngan jop beit kam dei kumta hynrei ka 2023 kan pynshisha ba ka Nongpoh kan jied ïa u briew ne ïa ka party. Ka jingkylla ki nongmihkhmat na ka wei ka seng sha ka wei kam dei shuh ka ba phylla namar palat 31 ngut ki ba la jop na ka wei ka seng sainpyrthei mynta ki la kylla seng ha ka elekshon”u la bynrap.
