SHILLONG:
U kyrtong ka Hills State People’s Democratic Party (HSPDP) u Bah Martle M. Mukhim na Mawkynrew konstitwensi ha ka 15 tarik Rymphang, u la ong ba u jaw ummat ban ïohsngew ïa ki kyntien kiba pynkylla khongpong da kaba kynnoh ba um ju leh ei ei lane trei ei ei, uba khapnap bad kumta ter ter. Hynrei kiba ïohi bad sakhi ki la ïohi ba u Bah Martle u la don bad u paidbah naduh kaba sdang bad haduh ba u la long kum u nongïalam bad haduh mynta u don bad ki paidbah ka konstitwensi bad ka jylla ho baroh kawei.
Haba kren ha ka jingïalang ka HSPDP ha Pingwait ka thaiñ Kharang jong ka Mawkynrew konstitwensi u la ong ba katba nang trei nang shah kynnoh bad katba nang lehkai katta nang shah ïaroh.
“Ki ong u Mar uba khapnap, lada kiwei kiïohspah kumno u Mar um ïoh spah. Nga sngew sangsot ïa ki para briew, ha ka jaka kin ong ban da lah kumba leh u Bah Mar ngim long shuh kumne, hynrei ki kren ban mar khongpong. Lada phi lah ban leh lang, 15 snem mynshwa ngin nym long shuh kumne”, la ong u Bah Martle
Lah ban kdew ba ki mat ba treikam jong u Bah Martle ka long u wanrah ki lynti ki synkien, ka bording, ka aiñ khyndew kaba dei ka hok longtrai jong ka jaitbynriew Khasi khara.
U la ong ba ka Jongkhsha,Nongjrong, Dienglieng, ka Pingwait, ka Kharang mynshwa kim don ka lynti ka synkien kaba biang hynrei mynta ka nuksa kum ka Nongjrong kadei kawei kaba la khring ïa ki nongwan jngohkai sha katei ka jaka.
U Bah Martle u la ong, “Shano kum kita ki jaitbynriew, shano kum kita ki briew, ban syrdep lut ki jingshisha baroh.
U la ong ba ka elekshon mynta ki pynjop ïa ki nongmihkhmat tang lyngba ka jingshah pynthame, “Ka jingjop da ka jingpynbeij da ka jingpynthame, ka jingjop da kaba pyntroiñ ïa ka jingmut jingpyrkhat jong ki briew ha kane ka konstitwensi bad nalor ka jingjot ngi duh ruh ïa ka jingkyrkhu”.
U la pynkynmaw ïa ka jingkren jong u symbud myntri rangbah ka jylla u Bah Prestone Tynsong, “Khasi pynbeij beit man ka san snem. Hynrei nga kum u Khasi nylla nga pynrem ïa kane ka jingkren jong une u briew”.
U la ong ba hadien ka jingwad ïa kadaw balei ka long kumne dei namar ka jingtlot jong ngi ha ka ïoh, “Nang te nang, tip te tip, sngewthuh te sngewthuh hynrei ha ka ïoh pat kylla bthuh ki jingmut jingpyrkhat. Ngi wan da ka iing kaba duk haduh bym lah shuh ban mutdur bad ngi im na ka jingïarap jong ki para marjan jong ngi hynrei kammut ba ïa kaei kabym dei ruh yn leh beit namar ba ïoh. Lada ka bym dei ngi ong da ka ktien khublei shibun hynrei ymdei ban ong ba ani sngewsang tang ba la ïoh. Kamdei kum ka mulh bad shisien ba ka mluh ka la kylla blad ym lah shuh ban pynbang bad hangne ki ïa pybam da ka pisa”.
U Bah Martle u la ong ba don kiba ong ba ka seng Congress ka khlem kuli, ka party BJP ym don kuli, TMC ym don kuli hynrei NPP ka don kuli “Haba ong khlem kuli ha kane ka elekshon ngi ong khlem ka nongrim hynrei ha kiwei pat ki party kuli ka mut ka pisa”.
U la kyntu ïa ki paidbah ka Mawkynrew konstitwensi ba kimdei shuh ban beij lane shah pynthame hynrei kidei ban jied ki nongïalam kiba lah ban wanrah ïa ka bha ka miat ka suk ka saiñ, ka roi ka par ha ka imlang ka sahlang baroh kawei.
