SHILLONG:
Ka Regional Democratic Alliance (RDA) myn ha ka 19 tarik Nohprah, 2023 ka la pynbna ïa ka kyrteng jong u Bah Robertjune Kharjahrin ban long kum u Kyrtong ka RDA ban ïa khun ïa ka Lok Sabha election na Shillong seat .
Ka Regional Democratic Alliance (RDA), kaba kynthup ïa ka United Democratic Party (UDP) bad ka Hill Sate People Democratic Party (HSPDP) ki la rai ban ïakhun lang ïa ka Lok Sabha Election, kum shibynta ban pynthikna ba ka Seng riewlum kan ïoh ïa ka jingjop ha kane ka election.
U Bah Robertjune Kharjahrin uba dei u President barim ka Hynniewtrep Youth Council bad u la pynïasoh sha ka UDP ha u bnai Naiwieng .
Haba kren sha ki ladpathai khubor u Bah Metbah Lyngdoh u la ong ba kum ka RDA ka sngewkmen ba ka jingïatai ban jied ïa u kyrtong ka RDA, tang kawei ka kyrteng kaba long jong u Bah Robertjune Kharjahrin ka mih bad kane ka paw ïa ka dak ka jingïatylli hapdeng ka UDP bad ka HSPDP hapoh ka RDA .
“Ka RDA kan ïatrei lang na ka bynta ka MP election bad kumjuh ruh na ka bynta ka MDC election ka ban sa long shen, bad ka RDA kan dang pynlong ruh ïa ki jjngïalang ban dang pynbit pynbiang ha kiba bun ki mat,” u la ong.
Haba kylli u la ong, “ha ka election MP kaba la dep ka la don ka jingïatrei lang bad baroh ki party na ka bynta ban kyrshan ïa u kyrtong ka UDP hynrei mynta ka kynti, kat kum ka jinglong jingman ha ka saiñpyrthei, ngi sngew donkam ban don ka jingïatrei ang hapdeng ka UDP bad ka HSPDP bad ban pynkhlaiñ ïa ka RDA”.
Ha kane ka jingïalang la wan ban shim bynta da u President ka UDP u Bah Metbah Lyngdoh, u President ka HSPDP u Bah KP Pangniang, u Myntri Sorkar u Bh Shakliar Warjri, u Minister u Bah Paul Lyngdoh, u General Secretary ka UDP u Bah Jemino Mawthoh, u nongialam ka liang pyrshah ha KHADC u Bah Titosstarwell Chyne, u MLA u Bah Lahkmen Rymbui, bad kiwei kiwei.
