MAIRANG:
U MLA ka Mawthadraishan Constituency uba dei ruh ha ka juh ka por u Myntri jong ka tnad Water Resources ula ong ba katkum ka jingïohi ka jong u, “U Soh ula ih bha ïa u Paduh (Bah Metbah Lyngdoh) ba un long noh kum u Nongïalam jong ka jylla Meghalaya bad u Padeng lane u Paheh pat un kyrshan beit triang nadien ba un poi sha kata ka thong.”
Ïa kitei ki kyntien u Bah Brolding Nongsiej ula kren ha ka jingïalang kaba lah long ha Madan Mot Tirot Mission Mairang ha ka 10 tarik u bnai Naiwieng 2022, jong ka jingrakhe dap shi snem ka Eastern West Khasi Hills District halor ka jingïoh ïala ka jong ka District kaba pura.
Ha katei ka jingkren jong u MLA ka Mawthadraishan Constituency u la ong, “Ka kyntien Paduh ka thew ïa u Bah Metbah Lyngdoh uba dei u Lamphang ka ïing dorbar thaw aiñ ka jylla bad ka kyntien Padeng lane Paheh ka thew sha u hi”.
U la ong ruh ba lada u Bah Metbah un long kum u Nongïalam jong ka jylla ka jingïohnong kan long ïa u kum u ‘Paheh’ bad ïa ki ar tylli ki Constituency kaba kynthup ïa ka Mawthadraishan bad ka Mairang Constituency bad ka shong ha ka kti jong u Bah Metbah ba un sngewthuh kumno ba un leh na ka bynta ki jingdonkam jong ka Constituency baroh lada u long kum u khliehduh ka jylla.
U la bynrap shuh shuh, “Ka Mairang bad ka Mawthadraishan Constituency kin sa sngewthuh hadien lada ki trai kiba la sdang ban trei ban pynroi pynman ïa ka thaiñ kin kut noh bad lada wan sa da kiwei pat ki bym pat shemphang kumba la long kiba la dep ban ïaid lynti sha khmat kan don bun ka jingïapher.”
