SHILLONG:
U nongaiktien ka Sorkar MDA-II , u ba long ruh u myntri ha ka sorkar jylla u la kdew ba u Symbud Myntri Rangbah ka jylla u Bah Prestone Tynsong, u dei u briew u ba biang tam ban kren halor ka jingkylla ka saiñpyrthei ha ka jylla hadien ba kut ka election ha Sohïong.
Ha ba kren sha ki ladpathai khubor, u Bah Paul Lyngdoh u la ong, “Kum ba nga ju pynpaw ba ïa ka rai jong ka election 2023, dei ban burom, ka rai u paidbah ka rai ba ka NPP ka jop na ki 26 tylli ki konstitwensi , bad ka ba la pynlong ban ym lah ban thaw ïa ka Sorkar marwei, kumjuh ka UDP ka ba jop 11 konstitwensi. Haba bishar ïa ka election resol, phin hap ban bishar katkum ki sector, ki Garo ki kyrshan bun ïa ka NPP, bad ki Khasi bad Jaiñtia ki ai ka vote ïa ka UDP.”
Ha ba kylli hato ka NPP ka la ju ïakren ïa ki MLA ka UDP ban pynïasoh noh bad ka, u Bah Paul u la kyntait da ka ba ong “Ngam pat ïohsngew kum kata bad kam don kum kata ka jingïakren”.
Halor ki jingkam ka NPP u Bah Paul u la ong, “Shibun bah ki jingkren ki ba ju kren ha rynsan ïalap election khamtam haba ka election ka dei tang na ka bynta kawei ka constituency, ha ba don 20 ngut ki nongkren ha kawei ka rynsan kim hap ban kren ïa ki jingkren ki ban khring ïa ki ladpathai khubor”, u la ong.
U Bah Paul Lyngdoh u la kyntait ruh ba ka don kano kano ka jingïapher jingmut hapdeng ka NPP bad ka UDP bad kadei tang ka jingtharai ban don kata ka jingkylla ha ka saiñpyrthei, hadien ba la dep ka election ha Sohiong.
Lah ban kdew hangne ba u Symbud Myntri Rangbah ka jylla u Bah Prestone Tynsong u la aiksai, ba ka lah ban don ka jingkylla ha ka saiñpyrthei ha ka jylla Meghalaya hadien ka 13 tarik Jymmang, hadien ka jingpynbna ïa ka resol jong ka election shiteng samoi ha Sohïong konstitwensi.
