SHILLONG:
U general secretary ka seng All India Trinamool Congrees (AITC) , u Abhishek Banerjee u la wan poi ha ka Shillong Umroi Aiport ha ka 24 tarik Kyllalyngkot bad la pdiang sngewbha ïa u da u vice president ka TMC Meghalaya u Bah George B Lyngdoh.
U Banerjee ryngkat kiwei pat ki dkhot nongïalam ka seng, ki la pyllait paidbah ïa ki mat treikam jong ka seng ryngkat 10 tylli ki thup jingkular ka ban pynwandur biang ïa ka jylla Meghalaya bad ban kyntiew ïa ka roi ka par jong ki paidbah.
Ha kane ka sngi, u nongïalam ka seng TMC, u Dr. Mukul Sangma u la ong “ki mat treikam ka seng kim dei satia kiba shu mutdur hynrei ki long kiba shisha”.
Ki 10 tylli ki jingkular ki kynthup ban tei ïa ki jaka sumar kum ki PHC, CHC, ban pynbha pat ïa ka ïoh ka kot bad ban rat dyngkhong ïa ka jingduk ha ka jylla, ban weng noh ïa Memorandum of Understanding ba la ïasoi hapdeng ka Assam bad ka Meghalaya, ban pynthymmai ïa ka tnat bording, bad ban pynbha ïa ki tnat pule puthi, tnat ïalehkai bad tnat jngoh kai pyrthei.
Shuh shuh u Sangma u la ong, “Ka jylla ka la shah tuh noh ïa ka roi ka opar bad ka por ka ladei ba ki paidbah ki dei ban mih noh na kane ka jingkhuslai”. Kumta u la kyntu ruh ïa kiwei ki nongthaw aiñ ban wan pynïasoh bad ka seng TMC.
