NONGPOH:
Haba kren hakhmat ki hajar ngut ki nongkyrshan kiba la wan ban ïashimbynta ha ka jingïalang ka TMC kaba la long ha Umroi, u Bah George B. Lyngdoh, kyrtong ka TMC na Umroi, u la pynpaw ïa ka jingsngewkhia kaba jur eh, halor ka jingleh donbor bad pyni bor da ki nongkyrshan ka NPP ha Umroi Constituency, ha kaba katei ka jingkren jong u, ka thew halor ka jingjia kaba dang shen ha Umroi, ba ka kurim jong u lem bad ki kynum, ki la shah ktah kti ha ki katto katne ki briew na ka Party NPP.
Haba kynmaw ïa katei ka jingjia, u Bah George Lyngdoh, u la jnang shiphang ban kren bad uba la jan jaw ummat, kaba la pynlong ruh ïa baroh ki paid nongkyrshan kiba la leit ban sakhi ïa katei ka jingialang, ba kin sngapjar.
Halor katei ka jingjia, u Bah George Lyngdoh, u la ong ba katei ka jingjia, ka la jia katba u dang wanphai na Kyrdem, ha kaba ki la don ka kynhun ki briew, kiba la leit ban pynheh jingrwai hakhmat ka ïing jong u, kaba don tang ka Kurim, ki khun bad ki kynum, ha kaba kitei ki briew, kiba la leit ha ryngkat ki tiensih tiensang bad kiba la pyrta ruh ‘Ha ka Kot, Ha ka Kot’, hynrei haba ka kurim bad ki kymum, ki la leit ban kren, pynban kitei ki briew, ki la kren kop pynban, da kaba ong lada kwah te wan.
Kumta haba kitei ki briew na ka ïing u Bah George Lyngdoh, ki la leit ban ïakren bad kitei ki briew, ha kaba nyngkong ka la jan poi sha ka jingïasngewthuh jingmut, hynrei ha kaei ka por la shu mih kynsan kumba 15 haduh 20 bad kiba la ker tawïar ïa ka lok bad ki kynum jong nga, kila kynjat ïa ka kurim jong nga, ki bok na shyntur, ki pajut ïa i shaka diang ka mon, bynrap u Bah George.
Shuh shuh, u Bah George, u la ong ba wat ïa ka kurim u MLA ruh kim salia ban leh kumne bad kan jia aiu ïa ki duk ki suk bad ki tymmen ki kro, lada kiba kum kitei ki briew kin don ha ka bor.
U Bah George B Lyngdoh, u la buh jingkylli ruh ba u la leh sniew eh haduh katno ïa ka Umroi Constituency, ba kitei ki briew ki wan ban leh kput bad ba ki hap ban wan tim sih tim sang ïa ka lok, ïa ki khun bad ka ïing ka sem jong nga, ba ki hap ban ktah kti wat ïa ka kynthei.
Namarkata, na ka liang utei u kyrtong ka TMC, u la kyrpad ia ki ïa ki paidbah ka Umroi Constituency, ba ki dei ban long kiba stad ban bishar, namar ba ki paid ha ka jylla hi baroh kawei, ki peit bad phaikhmat eh ïa ka Umroi ha kane ka ilekshong kaba mynta u snem bad ba kan pynmih ïa u nongïalam ka Ri-Bhoi bad ka jylla.
