SHILLONG:
U nongïalam ka Trinamool Congress Meghalaya uba dei ruh u nongïalam ka liang pyrshah ha ïingdorbar thawaiñ ka jylla, u Dr. Mukul Sangma, u la ong ba ka jingïarung ïamih na kawei ka seng saiñ pyrthei sha kawei pat kan don beit.
U la ong ba ha kine ki bnai ki ban wan, kum kine ki jingjia kin sa paw khambun bad u la pynkynmaw ba ym tang na kawei ka seng saiñ pyrthei hynrei na kiwei ruh kin ïohi ba ki MLA jong ki kin phet sha kawei pat ka seng.
“Hadien ba ngi la shim ïa ka rai rangbah, ngi ïohi ïa ka jingthrang jong ki paidbah ïa ka jingkylla,” u la ong.
U la bynrap ruh da kaba ong, “haba ïadei bad ka jingthaw ïa ka sorkar ha u snem 2023; kumba ka long mynta ka paw shai ba ka don ka jingthrang ha kaba ki paidbah ki wan ban ïashim bynta bad kumba ka long mynta, nga kular ba kum ka seng saiñ pyrthei ha ka jylla, ka dei tang kane ka seng TMC ka ban lah ban shimti ïa ka jingsynshar, ba ïaid beit, ïaid ryntih.”
Na ka liang u Dr. Mukul u la ong ruh ba dei ki paidbah kiba wad ïa ka jingkylla. U la ong ba kumba ka long mynta, ka TMC ka kiew bha da ka jingwan ban ïashim bynta jong ki paidbah sha ki jingïalang bapher bapher jong ka seng.
Haba ïadei bad ka jingmih noh jong ki MLA ka seng bad ka jingpynïasoh jong ki sha kiwei pat ki seng; na ka liang u Dr. Mukul u la ong, “ngam kwah ban jer kyrteng mano ba leit shano; kine ki dei kiba lah don jingmut lypa naduh nyngkong bad ki lah dep shim ruh ïa ka rai.”
“Ngi tip ïa kane bad ngi ruh ngi don la ka jong ka bynta kumno ban leh; kumba ngi ong uwei ne ar ne lai ki nongmihkhmat ki don kiba kwah ban kynriah ym tang na ka TMC hynrei na kiwei ruh,” la bynrap u Dr. Mukul Sangma.
“Ngi lah tip katno ngut ki MLA na ka TMC kin rai ban leit pynïasoh sha kiwei pat ki seng, na ki daw bapher bapher. Ki don ki daw kiba na ka liang ka TMC ruh ka la rai ban wad da kiwei pat ki kyrtong, namar kam lah ban long ba baroh ki MLA kin ïoh ïa ka tiket na ka seng, bad ban jop ngi dei ban shai halor kane,” la ong u Dr. Mukul Sangma.
“Baroh ki MLA kin ïakynduh jingeh bad hap ban trei shitom ban ïoh jingjop biang; kata ka dei ka jingshisha. Katno ngut kiba long MLA kim shym la lah shuh ban jop ha u snem 2018. Dei halor kine ba na ka liang ka seng ka la shim ïa ka rai ha ki katto katne ki konstitwensi ba ngi hap ban shim da kiwei ki lad bad ban buh da uwei pat u kyrtong,” u la ong.
Shuh shuh u Dr. Mukul u la ïathuh ba ka TMC ka lah dep don ki kyrtong ha kito ki konstitwensi ba lah dep mih noh ki MLA jong ka bad u la ong ba kine ki kyrtong kin jop suk ïa ka elekshon ha u 2023.
